Nongpoh, Ïaiong 03 : Ka jingbym lah ka tnad MeECL ban ker ïa u Transformer ha ka Shnong Umlyngkdait (New Tasku), kaba dei kawei na ka shnong kaba don ha Ri Bhoi Districtr, kane ka la wan rah ïa ka jingsngewkhia ïa ki nongïalam shnong bad ruh ki paidbah kaba dei na ka daw ka jingbym lah ban ker ïa utei u Transformer ba tan bording ilektrik ka lah ban buh jingma ïa ki khyllung ki khynnah ne wat ïa ki jingri jingdup hapoh jong katei ka shnong.
Haba la ioh ban ïa kren bad u Rangbah Shnong ka Shnong Umlyngkdait (New Tasku), u Bah Edwin Syngkli, u la ong ba kum ka bor shnong ka sngewkhia halor kane ka bynta ba ym shym la ker ïa utei u Transformer hapoh katei ka shnong bad kum ka Shnong ruh na ka por sha ka ka por ka la pynsngew sha ki bor ba dei peit ka tnad MeECL bad kene ka jingpynsngew ka shnong kam shym la seisoh satia.
U la ong ruh ka bor shnong ym tang ba ka la pynsngew halor ka jingma jong une u Transformer sha ki bor ba dei peit ka tnad MeECL, hynrei na ka liang ka bor shnong ka la dep ai ruh da ka jingthoh bad kumba paw haduh mynta kam shym la don kano kano ka jingshimkhia ban ker ïa utei u Transformer khnang ba kan nym buh jingma hapoh jong ka shnong.
“Ka bor shnong ka la pyndep ïa la kamram ban pynsngew sha ki bor bahalor ka tnad MeECL bad ka dei pat ka kamram jong ka ban ai jingïada da kaba ker ïa utei u Transformer” ong u Bah Syngkli bad lada ka tnad MeECL kam shim khia nangne shakhmat ka hap pat ban shim ïa ka jingkitkhlieh lada mih kano kano ka jingjia ba sngewsih hapoh jong ka shnong” u la bynrap.
Namar kata, na ka liang ka bor shnong ka dawa na ka tnad MeECL ba kan shim khia noh ban ker ïa utei u Transformer hapoh ka shnong khnang ba da kaba ker ïa utei u Transformer kan nym buh jingma ïa ki paidbah bad wat ïa ki jingri jingdup jong ki paidbah bad lada shuh iehnoh khlem da ker pat ka lah ban mih ka jingma bad lada jia pat kaei kaei kaba sngewsih mano ban shim ïa ka jingkitkhlieh, u la bynrap.
