Shillong, K’lyngkot 16 : U Myntri Rangbah ka Jylla Conrad K Sangma Mynta ka Lah Sngi U Blei ula iathuh ba ka Sorkar Jylla dang shen, ka la ïoh pdiang ïa ka jingthoh na ka kynhun Hynniewtrep National Liberation Council (HNLC) haba ïadei bad ka jingïakren iasuk kaba la sdang namar ki don katto katne ki jingpynshai ba ka seng ka kwah ban tip bad ïoh bad halor kane ka sorkar ruh ka la dep phah ïaka jubab sha ka seng.
Haba kyntait ban ïathuh ïa kiei kita ki jingpynshai ba ka seng HNLC ka pynpaw, u Conrad ula ong “Ngi ruh ngi la nang phah ïa ki jingjubab pynshai kum ka jingpyntip bad ruh ban ïoh ïa ka jubab na ka Sorkar Pdeng” haba bynrap “Hadien ba ngi ïoh jubab, ngin sa phah ktien sha ki bad ban pynïaid shakhmat ïa ka jingiakren”.
Haba pynpaw ba ka jingïakren iasuk ka don ha ka lynti kaba biang, u Myntri Rangbah ula ong “Ngi dang ïakren bad ki (HNLC) bad ka jingïa aiktien ka dang ïaid shaid shaid”.
Hynrei ula ong pat ba ki don katto katne ki mat kiba hap ban ïasyllok bad ki katto katne ki jingpynsngew kiba don bad bala pynsngew ki dei kiba kongsan bha hynrei u pynpaw ka jingkyrmen skhem ba baroh ki kynhun ba ïadonbynta ha ka jingïakren ki don ka jingkwah ban ïoh noh ïa ka jingsuk ba neh shirta.
“Ngi da angnud ban lah pynbeit noh ïa kane ka kam bad nga kwah ban ban biang sa shisien ba na ka liang jong ka Sorkar Meghalaya, ngi kwah ba kine ki jingïakren kin ïaid shakhmat bad ba ngin lah ban poi sha ka jingïabeit ïasngewthuh jingmut lang bad ngi ïohi ba ki kam kila ïaid ha ka lynti kaba dei hynrei namar ba kane ka dei ka dei kaba jyrwit jyrwat, kin don beit ki jingsngewkhia bad ka long kaba kongsan ban bteng ha kaban ïakren ban pynbeit ïa kine kiei kiei baroh. Nga ngeit skhem ba ngin lah ban pynbeit ïa kine ki ishu bad ban ïoh noh ïa ka jingsuk ba junom hapoh ka Jylla” ong u Conrad.
Halor ka jingdawa jong ka HNLC ban ïoh ia ka jingmap noh ïa baroh ki jingshah pynngat kyndon, u Conrad ula ong “Ki don katto katne ki kam kiba donkam ban ïasyllok ha ki katto katne ki kyrdan, na kata ka daw kam ïahap ïa nga ban ïakren ïa kane ka bynta”.
Ula pynthikna biang ba ka rai ba dang shen jong ka NIA ban khot hajir ïa ki Nongïalam ba hakhlieh ka HNLC, ka dei ka kam ka bym don eiei satia namar ka dei kaba hap ban leh. “Haba ka jingtohkit ka ïaid, ka dei ïa kaban khot hynrei kam dei pat ba kila (NIA) pynmih ïa ka hukum ban kem ïa ki..Ka dei tang ka jingkhot ban kylli jingkylli….ïa kine ki jingpynsngew ruh la dep ban pyntip sha Delhi. Kumba nga ong, watla ka long kumno kumno ruh ka kam, ngi la kut jingmut ban wad ïa ka lynti ban ïa jam shakhmat da ka jingïasngewthuh jingmut lang” ong u Conrad.
