Ka jingailad ïa ki Party ba don jingïadei bad ka BJP kan wanrah ka jingma ïa ki Khristan : Pala

Shillong, Kyllalyngkot 16 : U Bah Vincent H Pala, dkhot ka ïing Dorbar Thawaiñ Lok Sabha na Shillong Seat bad President ka Meghalaya Pradesh Congress Committee (MPCC) u la ong ba ki paidbah kim dei ban shah ïalam bakla ha ki seng saiñ-hima kiba ïatrei lang bad ka Bharatiya Janata Party (BJP) ha kane ka elekshon jied nongthawaiñ sha ka ïing Dorbar Thawaiñ ka Jylla Meghalaya mynta u snem 2023.
Kane ka jingkren u Bah Pala ka la long ha ka jingïalang ïakynduh bad ki nongïalam shnong ka shnong Lyngkhoi bad ki nongïalam ka Balang Presbyterian Lyngkhoi ha ka 16 tarik u Kyllalyngkot, 2023 ban ïa pyrkhat ïa ki kam jingpynkhreh na ka bynta ka jingïaseng Synod Sepngi ha u bnai Lber mynta u snem ha ka dong Madan Lyngkhoi Ranab Domlyngkut ha katei ka shnong.
U Bah Pala u la ong ba ki Khristan ha kiwei ki Jylla ka Ri India ki im hapdeng ka jingrit mynsiem bad ki jingeh namar ka jingshah thombor. “Peit ha Assam bad Chatisgarh kaei kaba la jia ïa ki riewngeit Khristan ! Kiba shah shim jingkheiñ namar ba ki dei ki Khristan bad kiba shah thombor ha kiwei pat”, u la ong.
Halor ka jingpynkhreh ïa ka jingïaseng Synod Sepngi khamtam ka jingangnud ki nongïalam shnong bad nongïalam balang ba un ïarap lem ïa surok ba 1.5 KM, u Bah Pala u la ong ba un sa ai ktien ha ki khyndiat sngi ban ïarap ïa ki kumjuh ka madan ban pynlong jingïaseng hynrei un ïarap lypa ïa ki mar bam.
U la ong ba ka Sorkar Jylla ka la dei ban buh ïa ka Corpus Fund na ka bynta ban ïarap ïa ki kynhun niam kynhun balang haba ki pynkhreh ïa ki kam pynlong jingïaseng kata ban shna ïa ki surok, pynbiang ïa ka um, ka bor ding ne kiwei pat ym ban ap haduh da mang tyngka na ka bynta kum kitei ki kam.
Na ka liang u Bah S Osborne Kharjana, kyrtong ka Congress na Sohiong, u la ong ba kane ka jingïalang ka long namar ka jingeh kaba ki nongshong shnong bad nongïalam Balang ki ïa kynduh bad ka jingkhot lang ïa u Bah Pala ka long ban ïakren ba un thaw lad thaw lynti halor kine ki kam.
Haba kynthoh ïa ka long ka man ka synshar khadar, u Bah S Osborne Kharjana u la ong ba ia ka Sorkar India la lam khmat da ka BJP kaba don ïa ka thong ban pyntreikam ïa ka Uniform Civil Code kaba long ka jingma ïa ki rit paid kiba dei ki riewngeit Khristan.
Ha ka jingïalang la ïa donlang da u Pastor TK Iawphñiaw, Tymmen Basan R Mawleiñ, Bah Richard Kurbah, Bah Bistarjune Lyngdoh nalor ki nongshong shnong bad kiwei pat bad ki samla na ka shnong ki la ai ïa ki prokram jingshad bad jingrwai.