Phah dorkhas ka KSU sha u Bah Prestone bymbeit ka thungkam hapoh ka Directorate of Prosecution

Shillong, Risaw 31: Ka Khasi Students’ Union lyngba ka Employment Monitoring Cell ka la phah dorkhas sha u Bah Prestone Tynsong, Deputy Chief Minister i/c Home (Police) Department halor ka jingbymbeit ka rukom thungkam ha Directorate of Prosecution ba la pynlong da ka MPSC.
Ha kaba ïadei bad kane na ka liang ka Seng bad ki paidbah hi kam sngewpher shuh ïa ka jingtorti ka rukom thungkam thungjam lyngba ka MPSC bad kane kan dang ïai jia katba pat pynkylla ïa ka rukom treikam jong ka MPSC.
Halor kane ka bynta, la khot application na bynta 6 tylli ki post jong Asst. Public Prosecutor ha u snem 2023.
Katkum ka advertisement uno uno ne kano kano ba kwah ban apply na bynta kine ki post, ki hap ban don 3 snem ka experience kaba mut ki dei ban dei ki muktiar kiba la ïasaid ha ïingbishar ym duna ïa ka 3 snem bad ki dei ruh ban long kiba la pyndep ïa kino kino ki criminal cases.
Hynrei kaba sngew lyngngoh ka long ba uwei na kine kiba pass bad mih kyrteng um shym la lah ban pynbiang ïa kitei ki kyndon ba don ha ka advertisement. Ka Seng ka la lap ruh ba u dang shu pass ïa ka eksamin ha u snem 2023 bad lehse um nym pat lah ban pyndep ruh ïa ka eksamin All India Bar Examination (AIBE) kawei na ki eksamin ba ki lawyer ki hap ban pass hadien ba la ïoh ïa ka law degree ban lah ban ïoh licence ban ïasaid kum u muktiar ha ïingbishar.
Ka jingshah jied jong une u kyrtong ne u candidate ka pyni ba ka don eiei sha lyndet ba ka MPSC ka la pynkheiñ hi ïa ka kyndon ba ka lah buh. Haba kim pyntreikam ïa ki kyndon kan myntoi aïu ban buh bad ha kajuh ka por ka jingdon jong kine ki kyndon ka pynlong ïa kiwei ba dang shu pass ba nym ïoh apply.
Ka Seng ka dawa ba ka Home (Police) department ka dei ban pynbeit ïa kine ki jingkynrum kynram bad jied ïa ki briew kiba dei hok ban ïoh.