Shillong, Risaw 31 : U Nongïalam ka NPP bad Myntri Sorkar u Rakkam A Sangma ha ka sngi Palei, ula pynpaw ïa ka jingsngew thikna ba ka party jong u, kan ïoh ïa ka jingjop ha ka elekshon shiteng samoi ka Gambegre da kaba tam kput haba kam ruh ba ka rai jong ka BJP ban ïakhun ïa ka elekshon kan dei kaba ktah jur bha ïa ka Congress kaba don ha Liang Pyrshah.
“Ka NPP kan ïoh ïa ka jingjop da ka jingkheiñ ban thaw record namar ka jingkyrshan ki paidbah kala nang kiew nang kiew. Kila sngewthuh namar ha u 2023, ka Gambegre ka don ha u nombor ba bakla namar kim tip mano ban thaw ïa ka Sorkar bad kumta kila vote ïa ka Congress bad u Saleng A Sangma ula poi shong sha Liang Pyrshah” ong u Rakkam.
Ka kurim u Conrad K Sangma Myntri Rangbah ka Jylla-ka Dr Mehtab Chandee A Sangma ka dei ka kyrteng jong ka NPP bad kan ïakhun pyrshah ïa 5 ngut ki kyrtong kiba kynthup ïa u Jingjang M Marak jong ka INC, ka Sadhiarani Sangma jong ka TMC, u Bernard N Marak jong ka BJP bad arngut ki kyrtong shimet-u Sengkrabirth M Marak bad Jerry A Sangma.
Haba pynpaw ba ka Gambegre kala ïoh ïa ka kabu ksiar, une u MLA ka Rongara-Siju ula ong “Ki lah ban jied ïa u/ka MLA, ba ïadonlang ha ka Sorkar. Ka dei ka dak kaba bha. Nga la thikna shispah na ka shispah ba ka Dr Chandee kan ïoh ïa ka jingjop” ong u Rakkam.
Ula ong ba ki paidbah ka Gambegre kin vote ïa ka NPP na ka bynta ka roi ka par jong ka Constituency. “Ki paidbah ka Gambegre ki donkam ïa ka roi ka par bad donkam ïa ka jingkyrshan jong ka Sorkar. Ki donkam ïa u/ka nongïalam, kiba lah ban ïakren bad ba ïajan bad ka Sorkar. Nga tip ba ki paidbah ka Gambegre ki dei kiba stad ban jied ïa la ki nongïalam”.
Une u Nongïalam ka NPP ula ong ba ka lyer jong ka Congress kam don shuh mynta ha Ri-lum Garo bad kan nym don jing ktah eiei ruh em ha ka elekshon shiteng samoi ha Gambegre.
U Rakkam ula ong ba ka rai jong ka BJP ban mih ïakhun ha ka elekshon kan dei kaba ktah jur bha ïa ka congress namar kine ki ar party ki dei kiba ïatreilang ha ka elekshon MP ba dang shu dep.
“Kila ïa vote lang ha ka elekshon MP ka Tura. Ka BJP bad ka Congress kila ïa vote lang. ïa kane la pynpaw pyrthei hi da u MDC ka BJP na Tura, u ba dei u kyrtong ban ïakhun na ka BJP ha kane ka elekshon shiteng samoi. Kane kam dei kaba nga kren ma nga hynrei dei u Bernard dalade uba la ïathuh ba ka BJP kala ïatreilang bad ka Congress ban pynjop ïa u Saleng bad ba kila ïashong jingïalang ha ka ïingsah jong u”. ula ong.
