Shillong, Risaw 31 : Ki nongïalam jong ka FKJGP Nongmensong Circle ryngkat ka Shillong City ki la kynduh markhmat ïa u Symbud Myntri Rangbah ka Jylla Bah Sniawbhalang Dhar ban kyntu ba dei ban pyndep noh kham kloi ïa ki Ïing baduk kiba don ha Nongmensong, khnang ban khanglad ïa ki kam jakhlia ba don ha ka thaiñ.
Haba kren bad ki lad pathai khubor hadien ka jingïakynduh ïa u Symbud Myntri Rangbah, na ka liang u General Secretary ka Seng Bah Allan Kharkongor u la ïathuh ba la kular ïa ki ban pyndep noh mardor ïa kitei ki jingtei.
“Ka jingshu ieh sah kumto khlem pyndep ïa ka jingtei ka la kylla long ka ktem jong ki kam jaboh ba harukom kaba kum ka seng bad ka shnong ngi sngewkhia bha. Ngi kyntu ruh ïa u Symbud Myntri Rangbah ba dei peit ïa ka tnad Urban Affairs ban tuklar noh mardor khnang ban ioh pyndep noh ïa ka kham kloi,” ong utei u Nongïalam ka FKJGP.
U ong ruh ba lada na ka liang u Symbud Myntri Rangbah um shimkhia ïa kane ka kam, na ka liang ka seng kim banse ban tuklar lang.
Katkum ka jingong jong u, ïa kitei ki jingtei la dep ban shna la slem bha hynrei kim shym la sam sha ki paidbah ba dei ban ioh bad kumta la donkam biang ban maramot namar bun kiba la duh.
Na ka liang ka FKJGP ka ïathuh ba ïa kane ka phang ki la pynsngew ruh ha u MLA ka thain ba dei ruh u Myntri ka sorkar Jylla Bah AL Hek ban tuklar lang.
“U MLA ka thain u la kular ïangi ban peit lang ïa kane ka ishu bad ong ruh ba lada dang donkam ban kynduh biang u long uba kloi na ka bynta ka jingdonkam ka shnong,” u la ong.
Na ka liang ka seng ka ïai ban ba kane ka ishu kadei kaba ktah ïa ka imlang sahlang kumta man ïai buddien haduh ba ka kam kan da urlong.
