Kwah ki nonghikai ban pynjynsur ïa ka RTE lyngba ka kyndon 25 kaba dei shaphang ka PTR

Shillong Risaw 21: Ka Meghalaya School Welfare Development Association, Central Body (MSWDA) lyngba u President u Bah H M Marbaniang ha ka jingïalang kaba la long ha Khasi National Dorbar, Mawkhar ha kaba 300 tylli ki skul, la ïakren halor ka National Education Policy ki la pynpaw ba ki kwah ban thoh da ka dorkhas sha ka Sorkar Pdeng lyngba u Myntri ka Tnat pule puthi ba yn sa phah ha kine ban wan ban kyrpad ïa ka Sorkar Pdeng halor ki jingduna kiba bun la ka long halor ki jingtei ne ki jingdonkam khambun ki nonghikai bad kiwei kiwei.
Na ka liang u Bah Marbaniang haba ïakren bad ki lad pathai khubor u la ïathuh ba halor kane yn sa pyntip kham bniah ïa baroh ki jingïakren ïa kane ka jingkyrpad ïa ka Sorkar Pdeng halor ka jingpyntreikam ïa ka NEP.
U la ïathuh ba la ïakren ruh halor ka jingrelax ne pynjynsur ïa ka RTE Act kumba la tip katkum ka section 25 ka kren shaphang ka Pupils Teachers Ratio (PTR) ba ki bor Sorkar jylla kidei ban bud pyrkhing ïa kine ki jingthung nonghikai kaba 1:30 ïa ki Lower Primary kaba long na ka bynta ka klas 1 haduh klas V bad 1:35 na ka bynta ki UP ki klas 6 haduh klas 8 kaba mut ba hapoh ka LP lada ki khynnah ki don haduh 60 ngut kin ïoh tang 2 ngut ki nonghikai bad ha UP pat ka long kongsan (Mandatory) ha baroh ki klas, manla ki Subject, khamtam ha ka science, maths, social bad language.
“Kaei kaba ngi kwah ban ïakren ka long halor ka jylla jong ngi kaba kynthup ïa ki shnong ki jong ngi kaba kynthup ïa ki shnong kiba rit ki thaiñ ba long lum ba ka Sorkar Pdeng kan pynlait ïa kane ka kyndon jong ka Act ha kaba ïadei bad ka PTR namar ha ki jaka sor ka lah ban long namar ngi lah ban ïoh ïa ki khynnah katkum ka PTR ne ha kiwei ki jylla ka suk hynrei lada phai sha ka Sorkar Jylla lyngba ka section 6 jong ka RTE Rules 2011 ka Sorkar Jylla ka la pyntreikam ïa ki kyndon ban ai skul ha ki jaka bym pat don skul hapoh ka 1km ïa ka LP bad 3km ïa ka UP hynrei lada peit ïa ka NEP ba mynta haba ïadei bad ïa ka jingjngai kim da kdew than eh hynrei dei ban pynbiang ïa ka kit ka Bah (Transport) ba ai ei ïa ki khynnah lane ban ai da ki bicycle ha ki jaka ba kyndong eh,” u la ong.
U la ïathuh ba ha Jylla Meghalaya ki khynnah kim ju ïoh ïa kitei ki lad. “Ngi la ïakren ruh halor ka PMSHAN ba la dep phah ka dorkhas sha ka Sorkar Pdeng lyngba ka Sorkar Jylla bad lah rai ban leit buddien sha Delhi lyngba ki Deligate ban sa phah ha u bnai Naiweng kumjuh halor ka exam DLED kito ki nonghikai ki bym pat ïoh ïa ka Original Marksheet na ka NOIS kiba la ap bad phah ïa baroh ki jingtip ba bniah sha ka Sorkar Pdeng.
Ha ka jingïalang la ïakren ruh halor ka Uniform Grant badei ban ïoh lut ki khynnah skul naba baroh shi katta ki ïoh tang ki khynnah skul Sorkar bad SSA.
La ïakren ruh halor ka jingbym rung kyrteng ki skul SSA hapoh ka Notified list khamtam eh ki skul ba pynïaid da ki riew shimet bad khamtam ki Mission, NGO Society, ka jingbym ïoh rung hapoh ka list ka khanglad ban ïoh thung nonghikai bad bun na kine ki skul ki la duna nonghikai hynrei haduh mynta kine ki skul kim shym ïoh lad ban thung nonghikai halor kane la rai ban thoh sha u Commissioner Secretary ka Education ban leit ïakren khambha.
“Kaba khatduh kadei halor ka CM-IMPACT ba la mynjur da ka cabinet ha kaba ngi ai khublei ïa ka Sorkar ba ka la mynjur ïa kane ka CM IMPACT plus grant in aid scheme na ka bynta ka Secondary bad Higher Secondary ba kadei ban treikam naduh u Rymphang 2027”, ong u Bah Marbaniang.
U la ïathuh ba la ïakren ruh halor ka SPF kaba dei ka science grant bad ïa ki skul ki bym kwah ïa ka relaxation ym dei ban pynbor.
“Kane mynta ka la long la kumba 20-25 snem ba ka Sorkar kam shym ai shuh ïa kane ka grant bad la khmih lynti ba ka Sorkar kan pynïoh ïa kane ka jingmyntoi.