Jowai, Jymmang 31: Ka Seiñ Raij Raliang ka la pdiang sngewbha sngewbha ïa ki tiar mynbarim kiba la wan ban ai da ki lai ngut shipara kiba kynthup ïa u Lambok Singh Lyngdoh, ka Queenvida Lyngdoh bad ka Daplinda Lyngdoh kiba shong basah ha Ladthalaboh Jowai.
Ïa ka jingïalang pdiang la pynlong hynnin ka sngi ha ïing ka Seiñ Raij Chrah-Umphula, la pdiang ruh ïa kitei ki tiar mynbarim sha ka Seiñ Raij Raliang na ka bynta ban buh sah kynmaw ha ïing “Booh Tiar Ïongrim” (Musium). Ka Seiñ Raij haba pdiang ïa kitei ki tiar kala pynpaw ïa ka jingsngew nguh kaba khraw ïa kitei ki lai ngut shi para kiba la wan ban ai ïa kum kine ki tiar ki bym ju kham ïohi shuh ha ka juk ba mynta.
Kine ki tiar kiba la wan ai sngewbha ki kynthup ïa u Cher behkpong, ka Wait ïada ha ka por thma bad u wei u Ketli Cha Nar ba la shna da ka Ri England. Ha kane ka juh ka sngi ka kong Idalana Lyngdoh na Raliang ruh kala ai sngewbha sha ka Seiñ Raij uwei u khiew stem barit.
Ïa ka jingïalang ba lyngkot la pynïaid da u President ka Seiñ Raij u ma Binroy Dkhar, katba ïa ki kyntien nugh Blei da u Rideiwa Dkhar bad ïa ki kyntien pdiang burom la ai da u General Secretary u ma Hamjhan H Dkhar ha kaba u la ong ba ka jingdon jong kane ka Museum kan long ka jingmyntoi ïa ka lawei jong ka pateng ka ban sa wan.
Kumjuh ruh la ïoh ïa ka jingkren pynshai na u Lambok Singh Lyngdoh, uwei na kiba la wan ai ïa kine ki tiar ula ong ba u kwah ban wan buh ïa kine ki tiar ha kum kine ki ïing kynshem tiar mynbarim khnang ban don kiba peit ba sumar ïa ki ban lait na ka jingjah klep. La ïoh ruh ka jingkren na u Dr. M. Tyngkan, u C. Lyngdoh Dolloi Eleka Raliang bad kiwei.
