Jowai, Jylliew 04 : Ka ophis jong u District Sports Officer (DSO) ha ryngkat ka West Jaiñtia District Sports Association (WJDSA) mynta ka sngi Saitjaiñ kala pdiang burom ïa ka kynhun West Jaiñtia Hills District Athletic Team kaba la long kum ka kynhun lahduh ‘Over All Champion’ ha ka lyngpung ïalehkai jong ka Chief Minister State Level Inter School Athletic Meet 2023 kaba la pynlong ha Nongbah Shillong.
Ïa kane ka kynhun la pdiang burom ha wah Gate hajan ka Challam Syngkon Petrol Pump nangne kitei ki kynhuh da ka jingkmen kila shim bynta ban mareh ha ryngkat ka jingïakynhoi da kaba rah lang ïa ki Trophy bad leit lyngba ka Iawmusiang-Moosalangkat, Ladthadlaboh bad pynkut ha madan Kiang Nangbah Stadium Jowai.
Ha Madan Stadium na ka liang ki nongpynïaid ka DSO bad ka WJDSA kila pynlong ïa ka jingïalang bad ban ai mynsiem ïa ki rangïalehkai (Athletic) lyngba ki jingkren naduh u DSO ma K. Passah, u Hony General Secretary WJDSA ma Lammot Oo Laloo, ha ryngkat ka jingdonlang u Working President ma E.M.H Passah, Vice President ma Patrict Lamare, ma S.K Lalo (Founder member ka WJDSA) nalor kiwei kiwei de.
Na ka liang ki nongkren kila ai ka jingkitbok kitrwiang ïa katei ka kynhun kiba la trei shitom ban wanrah ïa ka nam ka burom jong ka District hi baroh kawei, shuh shuh kila pynpaw ka jinglen lade bad ka jingtrei shitom jong kitei rangïalehkai (Athletic) ka District ha ryngkat ki nonghikai bad ki member ka WJDSA kila long syndon ki nongjop ha kane ka lympung hapoh ka Jylla.
La pynsngew ruh ba ka Jaiñtia Hills kadei ka wei na ki District kaba la pynmih shibun eh ki rangïalehkai kiba paw ym tang ha kane ka (Athletic) hynrei wat ki rangïalehkai ha ka phutbol kiba la leit mih khmat ïa ki Club bapher bapher jong ka Jylla bad shabar ka jylla kumjuh.
Haba phai sha kane ka kynhun ïalehkai jong ka West Jaiñtia Hills District kala long ka lahduh da da kaba ïoh ban khur haduh 23 tylli ki takma, kaba kynthup 14 tylli ki takma Ksiar, 6 tylli ki takma Rupa bad 3 tylli ki takma Rnong bad long syndon ka ‘Over All Champion’ mynta ka snem.
