Sa katno bnai, snem yn dang shimpor ban pyntreikam ïa ka Sports Polisi

0

Ka jylla katba nang mih ki sngi bad ki snem ka la sdang ban paw ha ki kam ïalehkai la ka long ha ka football, athletic, cricket, boxing, swimming, judo bad kiwei kiwei. Ym lah ban leh ba ka jingkiew ka kam ïalehkai hapoh ka jylla kadei lyngba ka jingtrei shitom ki state asscociation, ki skul, ki college, ki shnong, ki kynhun seng bhalang haduh ki riew shimet kiba la shim khia ban pynlong ïa ki jingïalehkai lyngba ki state level, inter-district, inter-school, inter-dong, knock-out bad kiwei kiwei kaba ïarap na bynta ki samla ba kin pynpaw pyrthei ïa la ki sap ïalehkai.
Watla ki samla ki don ka sap ka phong ïalehkai hynrei kiba bun ki kut hajuh tang ha la ka jong ka jylla namar kim don lad don lynti ban jam sha kiwei pat ki kyrdan na ka daw ba ka mei sorkar kam ithuh ban ïarap kyntiew lem na bynta jong ki ban poi sha kiwei pat ki rynsan ïalehkai kiba kham heh kum ha ka national bad wat ha ki international ruh kumjuh. Ka sorkar jylla ka la ïaid lynti mynta ha ki sanphew tylli ki snem ka jingïoh la ka jong ka jylla ba pura hynrei haduh mynta mynne kam pat don ki lad ki lynti ban ïarap na bynta ki samla ïalehkai khamtam kito kiba don shisha ka sap bad kiba wan na ki longïing baduk ban kyrshan lem ha ka pule puthi, ha ki kam ba ki trei man ka sngi.
Ki don shibun ki samla la ka long ki shynrang bad kynthei kiba don ka sap ïalehkai hynrei namar bym don ka jingïarap ki hap ban kynran dien noh ba ban ka jingduk ha kaba ki hap ban pynlut ka por ha ki jingbylla ban pyndap ïa ka ïing ka sem, ïa ki jingdonkam shimet. La ju sakhi ba ka sorkar lyngba ka tnad ki kam ïalehkai ka ju kren na ka por sha ka por ba ka buh ka thong ban kyntiew ïa ka jingïalehkai hapoh ka jylla da kaba kular ban tei ïa ki stadium, ki jaka ïalehkai naduh na nongkyndong, ban pynbiang ïa ki tiar ïalehkai, hynrei kine ki shu kut tang ha suiñ.
Ha u snem 2019 ka sorkar jylla ka la wanrah bad pruid dak halor ka sports policy da ka thong ban ïarap ïa ki samla ïalehkai ka jylla, hynrei haduh mynta mynne ka dang sahkut ha suiñ kut tang ha kaban eksamin. Ha kane ka rukom shaei ka lawei jong ki samla ïalehkai ka jylla kiba don ka mynsiem bad kiba thrang shisha ban kiew ha ki kam ïalehkai. Dang shen u Myntri ka tnad ïalehkai u la kyntu ïa ki skul bad ki college ba kin dang pyntreikam noh ïa ka sports polisi ha ki jaka pule jong ki bad ba ka sorkar kan sa ïarap ïa kiba ki skul bad college kim lah ban pyntreikam. Kane kan long ka jingïarap na ka bynta kito ki samla kiba wanrah nam bad burom kiba khur takma ïa ka jylla na ki jingïalehkai bapher bapher shabar jong ka jylla ba kin ïoh ban ithuh ha ki skul bad ki college ha ki kyrdan pule jong ki.
Hynrei wat ka sorkar dalade kam pat lah ban pyntreikam kumno tharai ki skul bad ki college kin pyntreikam, hato ka sorkar ka thmu tang ban pynlut kai ïa ka por, ka bor jong ki nongpynïaid jong ki skul bad college ne ka shu long tang ka jingkren lait jynhaw jong u myntri. Bad lada kane ka urlong shisha kan long ka jingkyrkhu ïa ki samla ïalehkai bad ka burom ruh ïa ka sorkar jylla. Lada ka sorkar ka don shisha ka thong bad lada ka kwah ba ki samla kin kiew ha ka kam ïalehkai bad ba ki samla kin ym kut noh tang shiteng lynti kadei ban pyndep ïa kiei kiei kiba ka la dep ban pruid dak.
Ban ap tang na ki state association, ki skul, ki college, ki kynhun seng bhalang, ki riew shimet haduh katno eh kin lah ban ïarap ïa ki samla ban kiew ha ki kam ïalehkai, ynnai ïakren ïa ka ïoh kam ïoh jam, hynrei ka shong eh ha ka sorkar ba kan pynstet ban pynbit pynbiang noh ïa kiei kiei kiba la pruid dak ban ïoh pyntreikam noh ïa ka sports polisi.

Leave A Reply

Your email address will not be published.