Nongstoiñ, Jylliew 4: “Ka seng WKSU ka phah ka kyrwoh sngew lem sha kiba haïing hasem jong I bah Lankupar Sawkmie vice president RBYF, I ba la khlad noh na kane ka sla pyrthei na ka jingjia ryngkhat ba sngewsih. Kum ki para ba ïatreilang ha ka imlang sah lang ka roi ka par jong ka jaidbynriew, ngi dap da ka jingsngewsih ïa ka jingduh noh syndet ïa utei u nongialam radbah na ka thaiñ Ribhoi”.
“Ka long ka jingduhnong kaba khraw ïa ka seng Ri Bhoi Youth Federation (RBYF) bad ym tang ia katei ka sengbhalang na katei ka thaiñ, hynrei ïa ngi ruh ki sengbhalang na kiwei ki thaiñ, kiba ngi la ïatreilang baroh shi katta na ka bynta ka Ri bad ka Jaidbynriew U Hynñiew Trep Hynñiew Skum”.
“Ka seng WKSU baroh kawei ka phah ka kyrwoh sngew lem ba to u Blei nongbuh nongthaw, un pyntngen ïa ki mynsiem kiba haïing hasem ki kur ki kha jong I bah Lankupar bam kwai ha ïing u Blei bad ai bah I Bah Lan ba ngi ju ïa khot ieid, in shong jah thait ha ka jingsuk”, pynkut ka kyrwoh na I samla D.Sun President WKSU Central body.
