Shillong, Lber 20 : Ka Iing Bishar High Court jong ka jylla mynta ka sngi, kala bthah ïa ka Central Industrial Security Force (CISF) ba kan pynpaw hapoh ka lai taiew, ïa ka jinglong la kloi bad ki lah ne em ban wan tehlakam ïa ka jingkhaïi tuh ïa u dewiong ha Meghalaya.
Haba shong bishar ïa ka PIL, ka ïing Bishar full bench ba la khlieh da u Chief Justice Sanjib Banerjee ha ka hukum ka la ong “Ai ba kane ka kam kan wan phai biang hadien ka 3 taiew na ka bynta ka CISF ba kan pynpaw ïa ka jinglong kloi”.
Haba buddien ïa ka hukum ba pynmih ha ka 13 tarik Lber, u Dr N Mozika ula pyntip ba ki jingdonkam ba hap ban pynkhreh na ka bynta ban wanrah ïa 10 pyrton ki CISF kan shimpor kumba saw taiew eiei.
U Dr Mozika ula kdew ba ka CISF kan wan halor ka nongrim ba ka jingbuh ïa ki kan long tang ar ne lai snem shuwa ba ka Jylla kan buh ïa la ki jong ki briew ban shimti ïa ka kam.
Ka ïing Bishar ka la ong naba ka Jylla kala pynpaw ïa ki plan ban shna lane ai jaka sah ïa ki bor pahara ka CAPF, ka Jylla ka dei ruh ban ïatreilang ha kaban ai jaka sah ïa ki pulit CISF kynthup ïa ki Commandant jong ki pyrton.
Ka la bthah ruh ba ka CISF ka dei ban ithuh lane buh ïa uwei lane bun ki briew ki ban peit ïa ka kam da kaba ïabujli bad ong “Kine ki bor pahara kidei ban ïoh ïa ka shithi thungkam na u Justice Katakey bad ha ka jingïadon lang ki nongmihkhmat naka Jylla, kin ïapeit ïa ki jaka bad ki jingdonkam ban buh ïa kine ki 10 pyrton”.
Ha kajuh ka por, ka ïing Bishar kala bthah ruh ïa ka Sorkar Jylla ban pynthikna ba ki 23 tylli ki weighbridge ba la tyrwa ki dei ban don noh bad ba dei ruh ban pynïeng kham bun ki weighbridge ha ki jaka ba kongsan da kaba ïasyllok lang bad ki bor pahara CISF bad hapoh ka jingpyni lynti jong u Justice Katakey.
Ka Iing Bishar kala buh ban shong bishar biang ïa kane ka mukotduma ha ka 12 tarik u Iaiong.
