Shillong, Lber 20 : U Nongïalam ba la rangbah bha ka NPP bad MLA ka Resubelpara u Timothy D Shira, mynta ka sngi nyngkong, ula jop suk namar u la shah jied khlem ka jingïaleh pyrshah ban shimti sa shisien ïa ka shuki Symbud Lamphang (Dy Speaker) ka ïingdorbar Thaw Aiñ ka Jylla.
Kane ka la wan jia hadien ba ki lai tylli ki seng saiñ pyrthei ba don ha ka Liang Pyrshah-ka Congress, All India Trinamool Congress (AITC) bad ka Voice of the Peoples Party (VPP), ki la rai ban nym pynïeng kyrtong ban ïakhun pyrshah ïa u Timothy.
U Timothy D Shira u dei u Symbud Lamphang jong ka ïingdorbar Thaw Aiñ jong ka samoi ba dang shu kut.
“Na ba la ïoh pdiang tang kawei ka kyrteng ba thep, nga pynbna hangne ba u Timothy D Shira ula shah jied kum u Symbud Lamphang” pynbna u Lamphang ka ïingdorbar u Thomas A Sangma.
ïa u Timothy la pyndon burom da u Myntri Rangbah ka Jylla Conrad K Sangma bad u Nongïalam ka Liang Pyrshah Dr Mukul Sangma hadien ba ula shah jied ban shimti ïa kane ka shuki jong ka ïingdorbar.
Haba pynpaw ïa ka jingsngewnguh ïa baroh ki Dkhot kiba la pyni ïa ka jingngeit bad jingshaniah ha u ha ka sien kaba ar, u Timothy ula kular ba un pynthikna ïa ka jingïada ïa ka ïingdorbar jong ka Jylla.
“Nga khmih lynti ruh ban ïoh ïa ki jingai jingmut kiba tei na baroh ki arliang mamla jong ka ïing” ula ong haba kyrpad ïa ki Dkhot ban bat ïa ka akor, ka burom bad ka iktiar jong ka ïingdorbar ha ka por jongka jingïatai nia.
U Timothy ula kular ruh ban ai ka jingkyrshan ba pura ïa u Lamphang ka ïingdorbar bad ong “Ka dei ka burom bad ka kabu ban ïadonlang ha kane ka rynsan bad phi. Nga ai khublei ruh ïa u Blei uba la kyrkhu (ïa kane ka ïing) kaba u Thomas ula bat ïa ka shuki Lamphang, Timothy kum Symbud Lamphang bad u Bah Paul kum u Myntri”.
Haba kren ha ka jingïalang pyndon burom ïa u Timothy, u Conrad ula ong “Nga kwah ban ai khublei ïa u (Timothy) halor ka jingshimti ïa ka shuki Symbud Lamphang. Ka jingshisha ba u shah jied da ka jingïamon lang baroh ka pyni ïa ka jingpdiang jong baroh ki Dkhot ka ïing ïa u Timothy.
Haba pynpaw ba u Timothy ula don ïa ka jingshemphang ban pynïaid ïa ka ïing DOrbar, ula ong “Nga thikna ba ha ryngkat bad phi (Lamphang) bad ma u kum u Symbud Lamphang, phin lah ban pynïaid ïa ka ïing Dorbar ha ka rukom kaba dei”.
Haba ïasnohkti lang bad u Nongïalam ka ïing Dorbar, u Nongïalam barim ka Liang Pyrshah bad MLA ka AITC na Songsak u Dr Mukul Sangma ula ong ba u da kwah eh ba u Timothy un shong sha ka liang jong ka Liang Pyrshah. “Nga kmen bha ban ïoh ïa u kum u Symbud Lamphang” ula ong.
U Lamphang barim bad MLA ka AITC na Nongthymmai Bah Charles Pyngrope, Myntri ka Sorkar Bah Paul Lyngdoh, MLA ka Congress na Mylliem Bah Ronnie V Lyngdoh bad kiwei, ki la ïashimbynta ha ka jingkren pyndon burom ïa u Timothy halor ka jingshah jied kum u Symbud Lamphang.
