Pan jubab ka FKJGP na ka DM&HO West Khasi Hills bym pat plie ïa ka jaka sumar khunlung

Nongstoiñ, Lber, 28: Ka jingpynslem jong ka sorkar ban plie ïa ka jaka sumar kaba kyrpang tang na ka bynta ki khunlung bad ki longkmie ba ar met kaba don ha Upper New Nongstoiñ, na ka liang ka Federation of Khasi Jaiñtia & Garo People West Khasi Hills Dsitrict, ha ka jingïalam u bah Chnadra Nongdkhar President bad u bah Carry Oscar Kharmuti vice president ryngkat ki dkhot, ki la leit ban ïakynduh ïa ka District Medical & Health Officer ha ophis treikam ban pan jingshai halor ka jingpynsahteng jong ka sorkar ban plie ïa katei ka jaka sumar.
Ha katei ka sngi na ka liang ka seng ka la aiti ruh da ka jingthoh sha ka DM& HO bad ka la kyntu ruh ïa katei ka ophisar, ba kan pynsngew sha ka sorkar ba kan pynkloi noh ban plie ïa katei ka jaka sumar. Namar haduh mynta ki longkmie ba armet bad ki khunlung kiba shitom ki dang hap ban leit phah sumar ha Civil Hospital kaba don ha Mawkadiang ha kaba ki shem jingeh haduh katta katta namar ka jingbun palat ki ba pang. Nalor kata ha katei ka Civil Hospital ki Doctor ki hap ban sumar ïa baroh kiba bun jait ki nongpang kumta ka shem jingeh bha khamtam ïa ki khunlung bad ki longkmie ba armet.
U bah Chandra Nongdkhar haba ïakren bad ki nongthoh khubor hadien ba ki la mih na kamra treikam jong ka DM&HO, u la ong ba na ka liang katei ka ophisar ka la ong ba ka jingpynsahteng jong ka sorkar ban plie ïa katei ka jaka sumar ba kyrpang tang na ka bynta ki longkmie ba armet bad ki khunlung, ka dei namar ka jingbym pat biang jong ki nongtrei. Hynrei hadien ba ka dorbar mang tyngka ka la kut, ka sorkar ka lah ban sa plie noh ïa katei ka jaka sumar.
Ki nongïalam ka seng ki la pan jingshai ruh ha kaba ïadei bad ka jingduna dawai ha ki ar tylli ki PHC ka Maweit bad ka Aradonga, ha kaba ka DM&HO ka la ong ba ka don ka por ba na ka liang ka sorkar kam shym la lah ban phah pynbiang ïa ki dawai dashin ha ki nong supply kumta ka don ka jingduna.
Ha kaba ïadei bad ka jignduna dawai ha ki ar tylli ki PHC, na ka liang ki nongïalam ka seng ki la pynpaw ïa ka jingsngewkhia, namar ba lada ym biang dawai ki nongpang naduh Maweit bad Aradonga tang na ka bynta ki dawai kuli ba shi sla ne ki dawai um ba shi bilor ar bilor, ki hap ban pynlut bai kali da ki spah tyngka ban wan thied na ki Pharmacy na Nongstoiñ.
U la ong ruh ba lada u dawai u shongdor tang arspah tyngka sa ka bai kali arspah tyngka ba wan arspah tyngka ba leit phai ka la long hynriew spah tyngka nalor ka bai bam bai dih sa ka bai lut sngi lada khein ka lah poi palat hajar bad lada dei kiba duk na ei keiñ kin ïoh pisa. Hynrei lada biang ki dawai dashin ha kitei ki jaka sumar pat ka la ai jingmyntoi shibun ïa ki nongpang.
U bah Nongdkhar u la ong ruh ba ki la pynkynmaw ruh sha katei ka ophisar ha kaba ïadei bad ka jingbym pat sdang ban pyntrei ïa ka Nongkynjang PHC, kaba dang shu kyntiew kyrdan ha u snem ba la dep. Nalor katei ka jingpan jingshai jong ki, ka DM&HO ka la ong ba ka sorkar kan sa khot tender noh shen na ka bynta ban pyntrei ïa katei ka Nongkynjang PHC. Namar ka pisa ka lah dep don lypa bad ka sorkar ka la mang haduh khyndai klur tyngka tam na ka bynta ban pynlut ha kaba shna ïa katei ka PHC.