Kumno ngin ïa shonglang ha bneng, lada ngim nang ban ïashonglang hangne ha pyrthei: Pastor (Dr) B.R. Sohkhia
Mawkyrwat, Lber, 28: U Pastor (Dr) B.R. Sohkhia ha ka jingkren jong u ïa ka Ktien U Blei ha ka Jingïaseng jong ka jingrakhe ïa ka jubili ksiar jong ka Bible Society of India Mawkyrwat Branch kaba la long ha ka Balang Presbyterian Mawkyrwat u la pynkynmaw ïa ki kyntien kiba long ka jingkyntu ïa ki para bangeit ba, “Kumno ngin ïa shonglang ha bneng, lada ngim nang ban ïashonglang hangne ha pyrthei”.
Shuh shuh u ha ka jingkren jong u la buh ruh ïa ka phang pdeng kaba long, “Ka Ktien U Blei bym kylla, ha ka pyrthei kaba kylla”, ha kaba u la pynshong nongrim na ka Kitab Deuteronomi ka lynnong kaba 4 bad ka dkhot kaba 1 bad kaba 2 kiba ong, “Te namarkata to sngew, Ah, Israel ïa ki hukum bad ïa kita ki jingbishar, ïa kiba nga hikai ïa phi, ïa ka ban leh ïa ki; ba phin ïoh im, bad phin leit hapoh ban ïoh ruh ïa kata ka ri ïaid kaba U Trai uba U Blei ki kpa jong phi u ai ha phi. Phin ym pyntam ei ei ruh ha kata ka ktien ïa kaba nga hukum ïa phi, lymne pynduna na ka, ba phin ïoh sumar ïa ki hukum U Trai uba U Blei jong phi ïa kiba nga hukum ha phi”.
Nangta na ka Kitab Jingpynpaw ka lynnong kaba 22 bad ka dkhot kaba 18 bad 19 ki kyntien kiba ong, “Nga phla ha uwei pa uwei baroh uba ïoh sngew ïa ki ktien jong ka jingïathuh lypa kane ka kitab: Lada uei uei ruh un da pynlang ha kine, U Blei Un pynlang ha uta ïa kita ki jingïap them ïa kiba la thoh ha kane ka kitab. Te lada uno uno ruh un shim noh na kita ki ktien ka kitab jong kane ka jingïathuh lypa, U Blei Un shim noh ïa ka bynta jong u na u dieng ka jingim, bad na kata ka nongbah kaba khuid, bad na kita kiei kiei ruh ïa kiba ka thoh ha kane ka kitab. Uta uba phla ïa kine kiei kiei ruh u ong, “Shisha: nga wan kloi. Amen, to wan, Trai Jisu”.
Bad lyngba kite ki kyntien u Pastor Sohkhia u la ai ruh ki kyntien jingkyntu na ka bynta ki para ba ngeit ryngkat ki nongsharai jong ki Balang ba kin ïai long ki nongtrei kiba sharai bad ïai duwai ha la ka sngi, namar ngi im ha kine ki sngi kiba eh bad ka por ka la dei ba kin khie joit na kaba ïoh thiah.
U Pastor K.T. Wanniang haba kren ïa ka ktien jong U Blei ha ka Jingïaseng por 10:30 mynstep u la kren na ka Gospel katba kum u Mathios ka lynnong kaba 7 bad ka dkhot kaba 21 bad 24 ki kyntien kiba ong, “Ym u briew baroh una ong ha nga, Ah Trai, Ah Trai, u ban ïoh leit hapoh ka hima ki bneng; hynrei uta keiñ uba leh ïa ka mon U Kpa jong nga uba ha bneng. Te mano mano baroh uba sngew ïa kine ki ktien jong nga, bad uba leh ïa ki, ngan tharai ïa u kum u briew uba stad, una tei ïa ka ïing jong u halor u mawsiang”.
Katba ha ka Jingïaseng por 6:30 janmiet u Pastor (Dr) S.I. Iawphniaw u la shim na ka Jingrwai Salm kaba 117 bad ka phang ka long, “Ko mynsiem jong nga to kyrkhu ïa U Trai bad wat klet ïa ki jingleh bha jong u baroh”.
Ka phang ha kane ka Jingïaseng jong ka rakhe ïa ka jubili ksiar jong ka Bible Society of India Mawkyrwat Branch ha kaba Presbyterian Mawkyrwat, South West Khasi Hills District mynta u snem 2023 ka long, “Ka Ktien U Blei ïa baroh”. Ha kane ka Jingïaseng jong ka Bible Society of Mawkyrwat Branch ki don baroh 87 tylli ki Balang.
Ha ka Jingïaseng ha ka por 10:30 mynstep la pynïaid ïa ka Jingïaseng da u Pastor R.K. Wanniang bud sa ka jingdwai sdang na u T.Bn. B.S. Marweiñ bad la pynbud sa ka jingai ki kyntien jingkyrkhu kyrdoh ne Greeting na u Pastor W.K. Syiemlieh uba dei u President jong ka BSI Mawphlang-Sohïong Branch, na u Pastor S.D. Marweiñ na ka BSI Balat Branch bad na u Pastor B.T.S Langstieh na ka BSI Shillong Auxiliary.
Ha ka Jingïaseng por 1:30 nohphai sngi la pynïaid ïa ka Jingïaseng da u Pastor S.N. Wahlang, ka jingpule bad jingdwai sdang na u Pastor T. Nongrem, nangta ha ka Jingïaseng por 6:30 janmiet pat la pynïaid da u T.Bn. H.L. Wanniang, President jong ka BSI Mawkyrwat Branch bad ka jingpule bad duwai sdang na u Pastor I.R. Sane Thongni bad ka jingkren na ka Ktien jong U Blei na u Pastor (Dr.) S.I. Iawphniaw.