Nongstoiñ, Lber, 28: Ka West Khasi Hills Fair Price Shop Dealer Association ka synjuk jong ki nongsam khaw ha West Khasi Hills, ki la byrngem ban sangeh sei khaw namar ki wholesaler kiba dei ki nongsam ïa u khaw na ki stock sha ki fair Price shop dealer lane ki nongsam khaw ha ki shnong bapher bapher, kim ju pynpoi ïa u khaw shaduh ki jaka sam kumba la bthah da ka sorkar.
Lada ki pynpoi ruh ki dang pan ïa ka bai kali bad ka bai daju, katba ka sorkar ka la bthah ba baroh ki wholesaler ki dei ban pynpoi ïa u khaw shaduh ki jaka sam khlem da shim bai kali ne bai daju.
Halor kane ka bynta jongn ka khia ka dhon, hynne ka sngi hat majai, katei ka synjuk ki nongsam khaw ki la pynlong ka jingïakynduh lang ha TRYSEM Hall ha phyllaw ka ophis u Deputy Commissioner West Khasi Hills, ha kaba la ïa donlang da u bah Grosdingland Tympuiñ President ka synjuk, u bah Joyfulstar Marngar secretary, u bah Iskarland Nongsiej nongaibuit ka synjuk bad kiwei kiwei ki riew rangbah.
Hadien ka jingïatai kaba la slem bha, ka jingïalang ka la phah ïa ki katto katne ngut ki nongïalam ba kin leit ban ïakynduh ïa u Deputy Commissioner ban ïakren halor katei ka mat. Hynrei namar ba u Deputy Commis-sioner um lait kumta kim shym la ïohlad ban ïakynduh ïa u.
U bah Iskarland Nongsiej nongaibuit ka synjuk u la ong ba ha ka jingïalang baroh ki nongsam khaw da kawei ka jingmut ki la rai lada ki wholesaler kim pynpoi ïa u khaw haduh ki jaka sam kin sangeh ban leit sei haduh ba kin da ïapynbeit da kumwei pat.
