Hadien ba da ki bun bun snem lehse hadien shiphew snem ei ei mynta ba la ïoh biang ïa ka Liang Pyrshah kaba tbit, ba khlaiñ ban tynrah ïa ka Liang Synshar.
Hooid ka Liang Pyrshah ka don tang 14 ngut ki MLA, 5 jong ka Congress, 5 jong ka TMC bad 4 jong ka VPP hynrei wat la ki don tang khyndiat ka labiang pat ban pynkhynñiuh ïa ka sorkar MDA-2 kaba don haduh 45 ngut ki MLA. Namar ha kane ka kynti ki don ki MLA kiba la rim bad ki don pat kiba dang thymmai ruh ha ka Liang Pyrshah. Kumta ki ba rim ki don la ka jong ka jingtbit namar ba ki la shemphang bad ki dei kiba la don teng ruh ha ka sorkar hynrei kiba dang thymmai ruh ki dei kiba tbit namar ki la biang ka kyrdan jingpule kumta ki nang bha ban kylli jingkylli ïa ka sorkar.
Ym lah ban len san snem mynshwa ka sorkar kam da salia than ïa ki Liang Pyrshah, hooid ki don ki MLA ba tbit kum u bah George Lyngdoh, bah Himalaya Shangpliang, u Zenith Sangma bad kiwei kiwei hynrei ha kane ka kynti te ka da pyn ïeng shkor ïa ka sorkar namar ba la wan rung kum u bah Ardent Basaiawmoit, bah Ronnie V Lyngdoh, bah Charles Marngar, bah Brightstarwell Marbaniang, don sa ki jong u Dr Mukul Sangma bah Charles Pyngrope bad kiwei kiwei kiba la ih bha ha ka saiñ pyrthei.
ïa kane lah ban sakhi na kane ka Dorbar Mang Tyngka kaba dang kut mynta ka sngi namar ha ki por mynshwa ki kynta kylli jingkylli kim da khluit than hynrei ha kane ka kynti te la jan man la ka sngi tar tar beit. Ka daw ka dei ba don ki player kiba tbit ban tynruh na ka diang bad ka mon bad kane ka la pynsmiej bha ïa ka sorkar bad teng teng la poi shaduh u pud ban ïa khluit ka jingïapyni nia ruh.
Kawei kaba kham pynsyier eh ïa ka sorkar ka dei ka jingdon ka VPP namar ka sorkar ka ïohi ba ki paidbah ki da ai shisha ka jingkyrshan ba pura ïa kane ka party kumba la paw ha ka election ba la dep. Namar wat la ka jop tang saw ngut ki MLA hynrei kiba rem ruh ki dei kiba shu rep salit beit.
Lada ïai bteng ban long kumne man ba shong Dorbar kan long kaba itynnad bad ki paidbah kin ïoh jingmyntoi bha khamtam mynta ba ki paidbah ki lah ban peit ïa ka jingiatai nia hapoh ïing dorbar ym tang ha ki TV hynrei wat ha ki mobile phone ruh. Kumta naduh sor shaduh nongkyndong ki paidbah ki la ïohi beit kumno ki MLA jongki ki long.
Nalor kata wat u bah Banteidor Lyngdoh uba la shah kren jot bha ha ka por election hynrei mynta ka kynti wat la u don ha ka Liang Synshar ruh u la kren ïa kiba bun kiei kiba ïadei ym tang ka jingmyntoi ki paid ka Mawkynrew Constituency hynrei wat ïa ka kam ïakajia pud hapdeng ka Assam bad Meghalaya ruh. Khlem pep kane kan pynsngew sarong ïa ki paid ka Mawkynrew namar ki la phah da u MLA uba lah ban ïasaid hapoh ka ïing Dorbar Thawaiñ.
Tang kawei ka long ba baroh ki MLA mynta kynthup ïa ki Myntri sorkar ruh kin hap beit ban khreh kot shwa ban wan sha ïing dorbar. Namar ki MLA kiba don ha ka Liang Pyrshah bad Liang Synshar ruh ki hap ban khreh kot khnang ba kin tip sani bha shwa ban buh ki jingkylli bad kumjuh ruh ki Myntri Sorkar ruh ki hap ban khreh kot bha khnang ban lah ban ai ka jubab kaba pynhun ym tang ïa ki MLA hynrei khamtam ïaki paidbah. Namar haba ki jubab hapoh ka ïing dorbar kynmaw ki jubab ruh hakhmat ki paidbah kiba peit ïaki lyngba ki mobile phone bad ki TV.
