Khur ka India ïa ka nam lahduh ha ka Tri-Nation International FT

Imphal, Lber 28 : Ka India ka la ïoh ban khur ïa ka nam lahduh ha ka lympung Tri-Nation International Football competition hadien ba ka la pynliem ïa ka Kyrgyzstan haduh 2-0 kol ha ka jingïakhun kaba long ha Khuman Lampak Stadium kaba la shlei mam da u paidbah nongpeitkai ha kane ka sngi Ba-ar.
Ka India kaba la ïoh ban pynliem ïa ka Myanmar da 1-0 kol haka jingïakhun kaba nyngkong ha ka sngi Balang ba la dep ka la pyntikna ba kan rah ïa ka nam lahduh jong katei ka lympung hadien ba ka la ïoh ban pynliem suk ïa katei ka kynhun jong ka Kyrgyz hynne ka sngi.
Haba phai sha ka jingïakhun, u Sandesh Jhingan u la ïoh ban khyrwit ïa ka kol sdang ha shwa ban kut artad ka kylla step, ha shwa ba u Sunil Chhetri un ïoh ban thep sa ïa ka kol kaba ar lyngba ka penalty ha shwa ban kut artad ka kylla miet kaba la pyntikna artad ïa ka India ban khur suk ïa ka jingjop.
Ka kynhun ka Ri kaba la buh thong ban khur ïa ka jingjop ban ïoh khur ïa ka nam lahduh, naduh mar ïa sdang ka jingïakhun ka la nion tyngeh ban ïoh thep kol bad dei ha ka minit kaba 34 jong ka kylla step ba u Jhingan u la ïoh ban thep ïa ka kol kaba itynnad bha lyngba ka bol kaba la pashat da u Brandon Fernandes.
Ka jingïoh jong ka India ban lamkhmat shi kol ka la pynkulmar ïa ki rangïalehkai ka Kyrgyz bad kane ka la ïai bteng tad ka minit kaba 84 hadien ba u Naorem u la shah pynur ha phyllaw kol jong ka Kyrgyz. Kumta na ka liang u kapten ka kynhun u Sunil Chhetri khlem bakla u la ïoh ban pynkhih jar kaba kylla long ka kol kaba 85 jong u ha ki lympung iakhun barri.
Haba phai sha ka liang pyrshah, katei ka kynhun watla ka pyrshang bun ki lad ki lynti hynrei wat haduh ban da kut ka por ialehkai ruh kam shym la ioh satia wat tang ban pynphai shi kol ruh.