Bym ïatylli ki Liang Pyrshah la jan kut sa ka Dorbar Mang Tyngka ym pat ïoh Nongïalam

By Mawphor News Desk On Mar 27, 2023

Shillong, Lber 26 : Namar bym don ka jingïatylli hapdeng ki Seng Saiñ Pyrthei kiba don ha ka Liang Pyrshah sa tang arsngi la kut ka Dorbar Mang Tyngka hynrei kat haduh mynta ym pat don Nongïalam Liang Pyrshah hapoh ka ïing Dorbar Thaw Aiñ ka jylla.
Hadien ba ka Voice of Peoples Party (VPP) ka la dep pynpaw shai kdar ba kan ym ïadon ne ïatrei lang bad kano kano ka kynhun lada thaw ha ka Liang Pyrshah hynrei kan shong beit marwei ha ka Liang Pyrshah, na ka liang ka Congress bad All India Trinamool Congress (AITC) ruh kim pat rai la kin ïatrei lang ne em bad kumba ka paw haduh mynta ka Congress ruh ka kwah ban ïoh ïalam ïa ka Liang Pyrshah bad ka AITC ruh ka kwah ïalam namar ki ïajop mar 5 ngut ki MLA.
Uwei na ki nongïalam ka Congress u bym kwah ban pynpaw kyrteng u la ong ba ka Congress kan sa shim rai hadien ba ki nongïalam ka party kin ïamir jingmut shwa bad ka High Command ha Delhli. Ka daw ka long ba ka AITC bad ka Congress ki khlem ïatrei lang ha Delhi.
Kumta ki Liang Pyrshah mynta ki sah ha ka umdum namar lada phai lei lei kat kum ki kyndon aiñ ban ïoh long Nongïalam Liang Pyrshah ka party ka dei ban jop la kumno kumno ruh 10 ngut ki MLA kaba mut shibynta na ka hynriew bynta ka jingdon ki dkhot jongka ïing dorbar kaba don 60 ngut. Hynrei kumba la kdew ka AITC ruh ka jop tang 5 ngut bad ka Congress ruh tang 5 ngut bad lada ki ïatrei lang kin poi 10 ngut namar ka VPP kaba don 4 ngut ki MLA ka la rai ban ym ïatrei lang bad kano kano ka kynhun.
Kat haduh mynta tang ka Congress bad TMC hi kiba la ai jingthoh sha u Lamphang u Thomas A Sangma ban ithuh ïaki bad ki ieh ruh ha ka jingstad bad jingshemphang jong u Lamphang ïano un jied kum u Nongïalam Liang Pyrshah. Halor kane ka shithi la ïathuh ba ki Liang Pyrshah kim pat ïoh ktien ne shithi na u Lamphang halor kane ka kam ruh.
Shuh shuh une u nongïalam ka Congress u la ïathuh ruh ba ka Congress kam pat ïoh ktien na ka TMC ban ïatrei lang ruh ban thaw ïa kawei ka kynhun. “ Lada ka TMC ka kwah ne kyrpad ban ïatrei lang ngin sa bishar bad ngin sa ai ïa ka rai” ong une nongïalam ka Congress.
Kaba kum kane ka jingjia ka la jia teng ha ka ïing Dorbar jongka jylla ha ka por ba long Lamphang u Abu Taher Mondal. Ha katei ka por kata ha u 2013 u Mondal ula ai ka jingithuh ïa u Dr Donkupar Roy (Bam kwai ha Dwar U Blei) kum u Nongïalam ka Liang Pyrshah wat la ka UDP ka jop tang 8 ngut ki MLA namar u la bud nuksa ïa ka rai jong u Lamphang ba rim u bah E.K Mawlong (Bam kwai ha Dwar U Blei).
U Bah Mawlong u la ai ïa ka rai kum u Lamphang da kaba pynshong nongrim ba wat lada jop tang shibynta na ka 10 bynta ka jingdon ki dkhot jongka ïing Dorbar kaba mut 6 na ka 60 ngut ruh lah ban jied ïa u Nongïalam ka Liang Pyrshah na kum kata ka Party. Tangba mynta ka kynti ka Congress, TMC bad VPP ruh kim kot tang mar 6 ngut ruh ki MLA ruh.
Kumta ka bor bad iktiar mynta ka shong ha u Lamphang da kaba u lah ban phah pynïasoh lang ïa baroh lai ki seng saiñ pyrthei ne ïa ka Congress bad TMC bad phah ba kin jied hi ïa u Nongialam ne u lah ban jied hi ma u ruh.
Lah ruh ban pynkynmaw ha utei u juh u snem ha u 2013 ka Liang pyrshah ba kynthup ïa ka UDP 8 ngut, NPP 2 ngut, GNC 1 bad uwei u MLA shimet ki la ïathaw ïa ka Meghalaya People Forum (MPF) kum ka kynhun ha ka Liang Pyrshah. Kumta ha ka kyrteng ka MPF ki la dawa ban thung ïa u Nongïalam Liang Pyrshah, ban ithuh ïa ka MPF kum ka kynhun Liang Pyrshah bad ban thung ruh ïa u Chief Whip ka Liang Pyrshah bad u Lamphang u la leh ïa kata.