Yn don ka jingkylla lada jop ka UDP na Sohïong, ai ksai u President UDP EKH

Shillong, Lber 26 : U President ka UDP East Khasi Hills, Bah Titos W Chyne ha ka sngi Saitjaiñ u la ai ksai ba ka lah ban don ka jingkylla ha ka saiñpyrthei, lada jia ba ka party ka jop ïa ka elekshon MLA na Sohïong constituency.
Ïa kane u Bah Titos ba dei ruh u CEM ka Khasi Hills Autonomous District Council (KHADC) u la kren ha jingïalang pynbna kyrtong ha Sohïong ha kaba ka UDP ka la pynskhem ïa u Bah Synshar Lyngdoh Thabah ban mih bujli ha jaka jong u (L) HDR Lyngdoh uba la khlad noh khyndiat sngi shwa ka elekshon.
“Ngi la dep ñiew lypa ïa ka Sohïong constituency ba kadei jong ka UDP. Kumta mynta ka shong sa ha phi ban pyntikna. Watla ngi jop tang 11 ngut ha kane ka elekshon ba la dep hynrei ngin trei shitom pat ban pyntikna ba ngin jop ha kane ka elekshon ha Sohïong khnang ba ka jingdon ki MLA kan nang bun. Lada ka UDP ka jop kham bun, ngim lah ban tip kaei pat kaban jia. Lada ngi jop na Sohïong, ka lah ban don ka jingkylla, mano ba lah ban tip naba ïa ka politik hi ym lah ban tip lypa,” u la bynrap shuh shuh.
Kumba long mynta, ka UDP kaba don 11 ngut ki MLA ka donlang ha ka sorkar synrop MDA 2.0 ba lamkhmat da ka NPP nalor ka BJP, HSPDP, PDF bad kiwei kiwei.
Kumban shu pynkynmaw, hadien ba la dep ban pynbna ïa ki nongjop ha kane ka elekshon MLA baroh ki party riewlum kynthup naduh ka UDP, VPP, HSPDP, PDF kyrtong shimet ki la ïalum lang ryngkat bad ki ar tylli ki party heh kynthup ïa ka Congress bad AITC ban thaw ïa ka sorkar bym dei NPP. Hynrei katei ka jingpyrshang kam shym la poi shaei shaei ruh.
Kumta, hadien kane na ka liang ka UDP bad ruh ka PDF ruh ki la leit ban ïa treilang noh bad ka NPP ban pynkhlaiñ ïa ka sorkar MDA 2.0.
Shwa kane, u President Rangbah ka Party, Bah Metbah Lyngdoh pat u la ïathuh ba ka party ka la khmih lynti ba kin jop kumba 15 – 17 ngut ki MLA hynrei ki la jop pat tang 11 ngut. Kumta ma u ruh u pynpaw lang ka jingkyrmen ba da ka jingjop na Sohïong kin lah ban kyntiew shuh shuh ïa ka jingdon ki MLA ha kane ka samoi ba mynta.
Da kaba pynshai shuh shuh halor ka jingdonlang ha ka sorkar MDA, utei u President u la ong ba ki leit ban treilang ym ba ki leit ban pynïasoh bad ka NPP. “Ka UDP kadei ka party bad ngin ïai neh kumta,” u la ong.
Katba u Working President, Bah Paul Lyngdoh u la ong ba u Bah Synshar un dei u ‘saibteng ban bteng ïa ki kam shakri paidbah kiba la dep ban maitphang da u Kni jong u hi, u Bah HDR Lyngdoh. Nalorkata, u ong ruh ba ha Sohïong hi kat shaba leit ki paidbah ki ïohi lut ïa ki matti ba im jong utei u MLA barim uba la khlad noh dang shen.