Duh leit thoh eksamin LDA ki samla ha DSJ Nongstoin ba poi dier por ki shithi na BOP Shallang

Shillong, Lber 26 : Ki samla kiba dei na ka shnong Umdang kaba hap ha West Khasi District ki la duh ban leit thoh ïa ka eksamin Lower Division Assistant (LDA) hapoh ka ophis District Session Judge ha Nongstoin tang namar ba poi slem ki shithi lyngba ka BOP Shallang sha ki samla.
Khlem da pynpaw ïa ki kyrteng jong ki samla kiba la duh ban leit thoh ïa ka eksamin LDA hapoh ophis jong ka DSJ Nongstoin la ïathuh ba katkum ka shithi katei ka eksamin kan long ha ka 22nd Lber 2023 katba ka shithi ki dang ïoh pdiang ha ka 25th Lber 2023, kitei ki samla ki kynnoh dei na ka jingleh sting kiba trei ha post ophis Shallang.
Na ka shithi kumba ka paw na ka liang jong ka District Selection Committee (DSC) jong ka West Khasi Hills District Nongstoin ka la phah ïa ka shithi ban pyntip ïa kane ka eksamin naduh ka 22 tarik Rymphang 2023 ba ka eksam kan long ha ka 22 tarik Lber 2023 hynrei ka shithi ka dang poi haduh ka 25tarik Lber 2023.
Na ka liang jong ki samla kiba la duh ban ïa khun ïa katei ka eksamin ki la kynnoh ba kane ka jingjia baroh ka dei na ka jingleh sting jong ka Post Ophis, la ïathuh ba kane ka shithi ka mih na Nongstoin bad ka Post ophis ka hap ha Riangdo bad ka shnong Umdang ka hap hapoh jong ka BOP Shallang.
La kynnoh ba ïa ki shithi kiba poi ym juh don ba pynpoi hynrei la buh beit ha ki dukan shnong bad na ki dukan ki juh pyntip sha kiba dei ban ïoh namar ha nongkyndong da ïa tip ka dei ka jongno ka shithi kaba poi bad ki trai dukan ki juh pynai sha kiba dei ban ïoh.
La ïathuh ba kum kane ka jingjia ban ïoh slem ïa ki shithi eksam wad kam kam dei kaba nyngkong hynrei ki la juh jia bun sien kum kine ïa ki samla ym tang ha ka shnong Umdang hynrei kiwei ruh ki shnong, lada ki post ophis ki leh kumne ka pynduh ban leit thoh eksamin ïa ki samla wad kam. Ki la buh ïa ka jingkylli mano ban shim ïa ka jingkitkhlieh.