Shah wiang ding ar tylli ki trok harum ka shnong Sohlong

0

Pynursla, Lber 26: Ki ar tylli ki trok kit maw kiba don ïa u Registration nombor ML 10 B 4045 bad ML 04 3835 ki la shah wiang ding ha rum ka Sohlong ka shnong kaba don ha rum ka Pynursla ha ka miet sngi Saitjaiñ.
Haba ïakren bad ki katto katne ngut kiba sakhi ïa kane ka jingjia ki la ïathuh ba kine ki ar tylli ki trok la antad ba ki ki dei kiba mih na jaka ïeng ki kali kit maw na Madan Lyntad ban leit shalan ïa ki maw kiba ki kit sha Bangladesh hynrei ynda ki ïeng harum ka shnong Sohlong ki la shah wiang ding noh bad ha kane ka jingjia ym shym la don mano mano ruh ba mynsaw bad ki la ïathuh ba la antad ba kane ka jingjia ka la jia ha ka por 10 baje eiei por miet.
Kat haduh ban da thoh ïa kane ka khubor ym pat shym la tip ïa ka daw jong ka jingshah wiang ding jong kine ki artylli ki kali bad ruh ïa u trai jong kine ki ar tylli ki trok.
Haba u Mawphor u la ïoh ban ïakren bad u OC jong ka Pynursla Constituency u la ïathuh ba na ka liang ka Police Station kam pat shym la ïoh ïa kino kino ki jingujor ejahar halor kane ka jingjia.

Leave A Reply

Your email address will not be published.