Mynshwa ki ong u Maheh la tymmen, mynta kin ong kumno pat, kylli u Bah Pope

Shillong, Lber 26 : U kyrtong ka UDP na Sohïong constituency, Bah Synsharkupar Lyngdoh Thabah u la buh jingkylli kylla ïa kiwei pat ki party kiba la wohdaw ïa u Bah HDR Lyngdoh ha ki rynsan ïalap elekshon mynshwa da kaba ki kynnoh ba u dei uba la tymmen.
“Mynshwa kiwei ki liang ki ong ba u Maheh u la tymmen, hynrei u Blei uba stad mynta u la pynmih pynban da uba samla. Phin ong kumno mynta pat, hato u dang samla palat?” la buh jingkylli u Bah Synshar haba kren ha ka jingïalang ha Sohïong hadien ba la dep ban pynbna ïa ka kyrteng jong u kum u kyrtong ka party ban aireng ha kane ka elekshon MLA kaban sa long shen.
Kumban shu kdew hangne, ïa u Bah Synshar ba dei ruh u pyrsa trai jong u Bah HDR Lyngdoh la jied da ka UDP Sohïong ban mih bujli ha jaka jong utei u rangbah uba la khlad kyndit kyndit noh khyndiat sngi shwa ka sngi thep vote. Katei ka jingkhlad kyndit jong u ka la pynlong ruh ïa ka tnad Election ban pynsangeh shwa ïa ka jingjied nongmihkhmat na Sohïong constituency.
Utei u kyrtong u la ong ruh ba shi taiew hadien ka jingkhlad noh u Kñi jong u, ki paidbah na kylleng ki la ïa phone bad kulmar mano pat ban mih bujli bad ïakhun. Kumta haba baroh ki paidbah ki la tyrwa ïa ka kyrteng jong u, ma u ruh khlem kyrngah u la shim ïa ka rai ban ïaid beit shakhmat.
Shwa kane, u la ïathuh ruh ba um poi pyrkhat satia ba ka jingaiti kam jong u Bah HDR ban nang ïaid shakhmat ïa ka kam pynïaid elekshon ha kiwei ki jaka kan poi pynban baroh ha u.
U la ïathuh ruh ba katkum ka jingïakren, hadien ba la dep ka elekshon MLA ma u pat un pynkhreh ïa ka elekshon MDC hynrei mynta ka paw kumba u Kñi u la dep ban ïohi lypa.
“Nga kynmaw ba ha ka jingïalang kaba long ha Rangshken i Maheh i la pynpaw ba ha ki 25 bad 30 snem ba i long nongmihkhmat im pat ju ïohi ïa ka jingwan jong ki paidbah kat katei ka jingïalang. Kumta nga kyrpad ba lada phi ieit shisha ïa i Maheh, ai lang kata ka jingieid ïanga ruh khnang ba ki ummat kiba jaw ha ka sngi ba khlad u Maheh kin kylla ummat jingkmen haka sngi ñiew vote,” u la bynrap shuh shuh.
Nalorkata, u ong ruh ba ki dei ban pynskhem ïalade ba kin ym ngop ruh wat ïa ki bor pisa kiba lah ban wan pynbiej ïa ki ha ki sngi shwa ban thep vote.
U ong ruh ba ynda u la jop da kaba treilang bad ki para MLA na ka party kin sa ïakhun ban pynphai biang ïa u Khnam ki kam pynroi ba un phai biang sha Rilum Khasi – Jaintia.
Shwa kane, na ka liang u Kpa jong u Bah Synshar, ba dei ruh u nongïalam ka party u la ïathuh ba wat ha ki sngi kiba khatduh shwa ba u Maheh un khlad noh ruh u dang kynmaw ïa ki paidbah Sohïong. U ong ruh ba kum ka iing, ki ai lang ka jingkyrshan met ban mynsiem ïa u khun ban pyndep pat ïa kaei kaba u Bah HDR u angnud na ka bynta u paidbah.
Ïa ka kyrteng jong u Bah Synshar ban long u kyrtong la wan ban pynbna da u President Rangbah ka Party, Bah Metbah Lyngdoh ha ka jingïalang kaba heh bha ha kane ka sngi Saitjaiñ.
Katei ka jingïalang ka la sakhi ruh ïa ka jingïam jong bun ki paidbah khamtam ha ka por ba u khun jong u Bah HDR Lyngdoh , u samla Nathaniel Rymmai u ai ka jingkitbok ïa u kyrtong ba un bteng ïa ki kam ban shakri ïa ki paidbah ka Sohïong kumba ju leh u kpa jong u ha ki phew snem baroh.
Ha kane ka sngi jan baroh ki nongïalam ka party la donlang ruh ki MLA kata naduh u Bah Paul Lyngdoh bad Bah Kyrmen Shylla kiba dei ruh ki Myntri sorkar, nangta Bah Renikton Lyngdoh Tongkhar, Bah Pius Marwein, Bah Mayralborn Syiem, Bah Balajied Synrem, Bah Mathew B Kurbah, Bah Nujorki Sungoh, nangta u President ka UDP East Khasi Hills Bah Titos W Chyne ba dei ruh u CEM KHADC, Dr. Jemino Mawthoh General Secretary ka party, Bah AF Dkhar, Vice President, ki nongïalam ka party na Ri Bhoi, Jaintia Hills bad ruh na kiwei kiwei ki jaka.