Ïaroh u Conrad ïa u Modi ba weng ïa ka AFSPA na kiba bun ki jaka ha ki jylla North East

0

Shillong, Lber, 26: U Myntri Rangbah ka Jylla u Conrad Kongkal Sangma u la ai jingïaroh ïa u Myntri Rangbahduh ka ri u Narendra Modi bad ïa u Myntri ka tnat Kam Pohing u Amit Shah halor ka jingweng noh ïa ka Armed Forces (Special Powers) Act, 1958 (AFSPA) na kiba bun ki bynta jong ki jylla ka thaiñ Shatei Lammihngi jong ka ri India.
U Sangma u la pynpaw ruh ïa ka jingkyrmen ba shen yn sa lah ban weng pura ïa ka Armed Forces (Special Powers) Act (AFSPA) na baroh ki bynta jong ka thaiñ Shatei Lammihngi.
“Ha ka rai ba la shim dang shen, ïa ka AFSPA la weng na kiba bun ki bynta jong ka thaiñ Shatei Lammihngi. Nga ai khublei ïa u @narendramodi ji bad ïa u @AmitShah ji. Ngi kyrmen ba shen kane ka aiñ ïakjakor yn sa lah ban weng na baroh ki bynta jong ka thaiñ Shatei Lammihngi,” la pynpaw u Sangma ha ka rynsan Tweeter.
Ha ka 25 tarik mynta u bnai, ka Sorkar Pdeng ka la weng ïa ka jingpynjari ‘disturbed areas’ ba la pynbna hapoh ka Armed Forces (Special Powers) Act, 1958 (AFSPA) ha Assam, Nagaland bad ha Manipur.
“Kan long kan sngi ban sah jingkynmaw ïa ka thaiñ Shatei Lammihngi! u PM PM @narendramodi uba ïalam ïa ka Sorkar India sa shisien pat u la rai ban pynduna ïa ka jingpynbna ‘disturbed areas’ ha Nagaland, Assam, bad ha Manipur hapoh ka AFSPA. Ïa kane ka rai la shim kum ka jingthmu ban pynneh ïa ka shongsuk shongsaiñ ha ka thaiñ Shatei Lammihngi,” pynpaw u Amit Shah ha ki jingthoh ba u la pynmih ha ka rynsan Tweeter.
Ha u Ïaïong, 2022, ïa ka AFSPA la weng na kiba bun ki District jong ki jylla ka thaiñ Shatei Lammihngi.
Ha Assam, ïa ka jingpynbna ‘disturbed area’ la pyntreikam naduh u snem 1990 bad hadien ba ka shongsuk shongsaiñ ka la wan phai biang, ïa ka ‘disturbed area’ la weng na baroh kawei ka jylla Assam, hynrei lait noh tang ha ki khyndai tylli ki district bad ha kawei ka Subdivision jong kawei ka district naduh ka 1 tarik, Ïaïong ha u snem baladep.
Ha Manipur, lait noh hapoh ki jaka ba hap hapoh ka Municipal ha Imphal, ïa ka jylla baroh kawei la pynbna kum ka ‘disturbed area’ ha usnem 2004 bad kane ka aiñ ka la treikam naduh katei ka por.
Ha ka 1 tarik, Ïaïong, 2022, kumba 15 tylli ki Police Station jong ki hynriew tylli ki district la pyllait noh na ka jingshah kynthup hapoh ka AFSPA.
Ha kawei pat ka liang, ha Nagaland, ïa ka AFSPA la pyntreikam naduh u snem 1995 bad la weng noh na ki 15 tylli ki Police Station jong ki hynñiew tylli ki Districts ha ka 1 tarik, Ïaïong 2022. Hynrei, hadien ka jingai jingmut jong ka komiti ba la thung da ka Sorkar, ïa ka AFSPA la weng sa na ki lai tylli ki Police Station naduh ka 1 tarik, Ïaïong, 2023.

Leave A Reply

Your email address will not be published.