Pynwai ka ïingbishar HC ïa ka mukotduma PIL halor ka elekshon GHADC ai por 6 bnai ïa ka Delimitation Committee

Shillong Nailur 29 : Ka ïing Bishar High Court jongka jylla ha ka Lah Sngi U Blei ka la pynwai noh ïa ka PIL ba kyrpad ban pynlong kloi noh ïa ka elekshon MDC sha ka Garo Hills Autonomous District Council (GHADC), haba pynpaw ba ka Sorkar ka la dep pynjlan ïa ka samoi treikam jong ka Council bad thung ïa ka Delimitation Committee.
Ka Division Bench ka Chief Justice ka Revati Mohite Dere bad Justice W Diengdoh ka la pynmih ïa kane ka hukum haba shong bishar ïa ka PIL ba la mudui da u Nilberth Ch Marak ba kyntu ban bthah pynlong noh ïa ka elekshon GHADC lane pynjari da ka Administrative Rule.
Haba shong bishar, u Advocate General ND Chullai ula aiti ïa ka affidavit jong u Joint Secretary, District Council Affairs, Rapborlang Kharbihkhiew ba 2 tarik Nailar 2026.
Ka affidavit ka pynpaw ba namar ka jingsniew ka shongsuk shongsaiñ, ka Sorkar ha ka 11 tarik Lber 2026, ka la pynjlan ïa ka elekshon GHADC tad haduh da pynmih da kawei pat ka hukum.
Ka la pynpaw ruh ba ha ka 18 tarik Lber 2026, u Lat ka Jylla, haba sngewhun ïa ki jinglong jingman, ula pynjlan ïa ka samoi treikam jong ka Council bad ki dkhot sa hynriew bnai naduh ka 19 tarik Iaiong 2026 haduh ka 18 tarik Risaw, 2026, hapoh ka proviso to sub-paragraph (6A) jong ka paragraph 2 ka Sixth Schedule pule lang bad ka Rule 7 jong ka Assam and Meghalaya Autonomous Districts (Constitution of District Councils) Rules, 1951.
Ka affidavit kala pynpaw ruh ba ha ka 6 tarik Iaiong 2026, ka GHADC ka la thung ïa ka Delimitation Committee ban bishar ïa ka jingdon paid ki jaidbynriew ha ka thaiñ bad ban pynbeit mar kat juh ïa ki constituency ka GHADC kaba pynshong nongrim kat kum ki khana samari bad ka jingdon paid.
Kat kum ki kyndon ba la buh, ka Committee kan hap bishar ïa u pud u sam kaba pynshong nongrim halor ka jingdon ki briew bad ka jinglong ki jaka, pynkhreh ïa ka draft delimitation, pynlong ïa ka jingïasyllok paidbah bad ki hearing, bad rai ïa ki jingai jingmut ïa kiba thymmai halor u pud u sam ki constituency lane kiba la pynbeit da kumwei.
Ka Committee kan hap ban aiti ïa ki jingai jingmut ha u Secretary ka Executive Committee ka GHADC hapoh ka hynriew bnai naduh ka sngi ba pynmih ïa ka jingpynbna, ryngkat ka kyndon ban pynjlan ïa ka samoi treikam ka Executive Committee.
“Haba pyrkhat ïa kine kiei kiei, ïa mynta, ngim shym sngew ïahap ban mynjur ïa ka jingkyrpad jong u nongmudui” ong ka ïing Bishar.
Ka ïing Bishar ka la kren shai ba ka long laitluid ïa u nongmudui ban file ïa ka mudui biang lada ïa ka elekshon ym shym la lah ban pynlong hapoh ka por kaba dei.