Nongpoh, Naiwieng, 04: Ka seng Ri-Bhoi Youth Federation hapoh ka jingïalam u Bah Bipul Thangkhiew President, u Bah August Sten Adviser lem bad ki dkhot mynta ka sngi ka la leit ban ïakynduh syndon ïa u Deputy Commissioner ka Ri-Bhoi District u Abhilash Baranwal ban wad jingtip halor ka jingpyntreikam ïa ka aiñ Meghalaya Residents Safety Security Act (MRSSA) – 2016 ha Ri Bhoi District, ka jingpyntreikam ïa ka Entry bad Exit Point bad kumjuh ruh ka jingpyntreikam ïa ka skhim Saubhagya kaba dei ka shim ban pynpoi bording sha man ki thliew iing.
Haba kren sha ki lad pathai khubor naka liang u Bah Bipul Thangkhiew President ka seng RBYF, u la ong ba kum ka seng ka la leit ban ïakynduh bad ïakren ïa ki mat ba kongsan, kawei ka dei ka jingpyntreikam ïa ka aiñ MRSSA 2016, ba la ki shnong ki la ïoh pdiang ne em ka shithi na u BDO ha kaba ïadei bad ka jingpyntreikam noh ïa kane ka aiñ, katkum ka notification ba la pynlait da u DC ka Ri-Bhoi ha ka 3 tarik October 2016.
Kum ka seng ka leit ban wad bñiah halor katei ka bynta bad kum ka seng ka ai ka jingïaroh ïa u DC ka Ri-Bhoi u ba la shimkhia ïa ka jingdawa ka RBYF ban pyntreikam noh ïa ka MRSSA ha Ri-Bhoi District namar ki dei ki 13 tylli ki sengbhalang kiba la dawa naduh u 2013 ban pyntreikam ïa ka ILP bad ha u snem 2019 naka liang ka iing dorbar thawaiñ ka jylla ka la rai ban mynjur ban pyntreikam ïa ka ILP ha ka jylla jong ngi bad phah ruh ïa ka rai sha Parliament hynrei haduh kine ki sngi la ïohi ba katei ka aiñ kam pat urlong, hynrei katba ngi dang ap ïa ka ILP ngi donkam ruh ki aiñ ïada ban tip mano ba rung bad mano ba shong ba sah bad trei bylla ha kane ka jylla jong ngi.
Kum ka seng ka buh ruh ka jingkylli ïa ka sorkar namar ha kane aiñ la phiah ha ki 2 bynta ba kynthup ïa ka District Task Force Committee kaba aibor sha ki Rangbah Shnong bad ki paidbah ban peit mano ba wan rung ne shongwai sha ki shnong ki thaw bad kaba ar ka dei ka Entry bad Exit Point kaba ka sorkar ka dei ban pyntreikam ban tip mano ba rung bad mano ba la mih na kane ka jylla jong ngi, ha kaba shibynta jong katei ka aiñ u DC u la pyntreikam hynrei ïa ka Entry/Exit pat ka sorkar ka shim ha kano ka bynta.
Shuh shuh u Bah Bipul u la ong ruh ba ka sorkar ka la pynlut da ki klur ban plie paidbah ïa ka Entry Point ne Facilitation Center ha Umling ban lum jingtip ïa ki nongrung ha ka jylla jong ngi hynrei mar sien sdang ka khlam Covid-19 la pynlong pynban ïa katei ka jaka kum ka Covid Centre khlem da pynïaid bad pyntreikam ïa ka katkum ka MRSSA bad mar ïa kut ka khlam Covid katei ka jaka ka la kylla iing jah syndon khlem treikam shuh, kaba la kylla long pynban ka ktem ki kam sniew bad lehsih shaba palat, bad kum ka seng ka la shim ruh ïa ka rai mynta taiew ban leit pynkhuid ïa katei ka jaka ha Umling bad ban buh jingkylli ruh ïa ka sorkar ha kano ka bynta ka thmu ban buh ïa kane ka jaka.
U Bah Bipul u la ong ruh ba ka mat kaba ar ba kum ka seng ka la ïoh ban ïakren bad u DC ka dei halor ka jingpyntreikam ïa ka skhim Saubhagya hadien ba ka sorkar jylla ka la thmu ban pynduh noh ïa kane ka skhim, namar katkum ka jingkren u Myntri Rangbah la ong ba satang 17 tylli ki shnong ha Ri-Bhoi District ki bym pat lah ban pynpoi bording elektrik bad ha ka jingwad jingtip jong ka seng la lap ba kam dei tang 17 tylli ki shnong namar ka jingpyntreikam ïa katei ka skhim ka dei tang sha ki thaiñ Eastern Ri-Bhoi bad mynta ka sorkar ka la sdang ba pyntreikam sa ka skhim RDSS ban bujli ïa ka skhim Saubhagya bad kum ka seng ka la dawa ruh na u DC ba u dei ban pyntreikam kloi khnang ba kito ki longiing ba duh ïa ka skhim Saubhagya kin ïoh ïa katei ka skhim ba thymmai.
Shuh shuh ka seng ka la bthah ruh ïa ki dkhot ka seng bad ki nongïalam shnong ban buh jingkheiñ ïa baroh ki longiing ba duk kiba don hapoh Below Poverty Line katkum ka khanasamari jong u snem 2011 kino ki longiing ba haduh kine ki sngi kim pat ïoh pdiang ïa ka skhim Saubhagya ne RDSS ba kin pyntip sha ka seng khnang ba baroh ki shnong kin shah kynthup khnang ba kum ka seng kan lah ban ai jingthoh sha u DC bad ka sorkar.
