Nongstoiñ, Lber 06: Namar ka jingpynsahteng jong ka sorkar ban mang pisa na ka bynta ban pyntrei ïa ka surok Nongstoiñ Rambrai haduh Kyrshai, na ka bynta ka phase II kaba dang sah kumba 37 kilomitar, ki nongïalam ka FKJGP Rambrai circle ba la synran lang da ki nongïalam ka FKLJGP West Khasi Hills, ha ka sngi palei ki la leit ban ïakynduh ïa u Deputy Commissioner ka West Khasi Hills Bah Garod LSN Dykes ban kyrpad ba un pynsngew sha ka sorkar ba kan pynkloi noh ban mang pisa na ka bynta ban pyntrei noh ïa ka phase II.
U bah Jiedstarland Lyngkhoi president ka FKJGP haba ïakren bad ki nongthoh khubor hadien ba ki la mih na kamra treikam jong u Deputy Commissioner, u la ong ba ka jingpyntrei ïa katei ka surok arlaiñ, kaba sdang na Nongstoiñ ka dang dep ban pyntrei tang ïa ka phase I kaba poi haduh Mawthir ha ka jing jngai kaba laiphewsan kilomitar, hynrei ka phase II kaba ka jingjngai ka long haduh 37 kilomitar ym shym pat la pyntrei satia.
U la ong ruh ba ha katei ka jingleit ïakynduh jong ki u Deputy Commissioner, u la ong ba haduh mynta ka sorkar kam shym pat la ai ktien ei ei ha kaba ïadei bad ka jingpyntrei ïa ka phase II. Hynrei wat la katta ruh un sa shimkhia ban pynkynmaw sha ka sorkar lyngba ka tnad PWD ba kan pynkloi ban phah ïa ki briew ki ban leit sorbe bad sor jamin kumno ban shna ïa katei ka surok.
Ha kaba ïadei bad ka jingbym pat leh ei ei jong ka sorkar ïa katei ka bynta ba dang sah jong katei ka surok, na ka liang jong ka FKJGP Rambrai circle ka sngewkhia bha namar ba ka sorkar ka la dep pynsngew na ka por sha ka por ba ka surok arlaiñ na Nongstoiñ Rambrai haduh Kyrshai, ka dei ka thong ba hakhmat eh ba ka sorkar ka don jingthmu ban pyndep. Hynrei haduh mynta kam pat mang pisa ne leh ei ei wat la ka jingpyntrei ïa ka phase I ka la jan dep artad satang kumba katto katne bnai.
U la ong ruh ba ka sorkar ha kane ka dorbar jong ka Assembly kaba long ha kine ki sngi ka la dei ban shimkhia bad ban mang pisa na ka bynta ba pyndep noh ïa katei ka surok.
Ka seng kan peit la ka sorkar kan shimkhia ne em ban pyndep ïa katei ka surok bad lada kam shimkhia, ka seng kan sa shong pyrkhat ban ïakren bad ban pyni da ki kam. Namar katei ka surok ka dei u bud lum jong ka ïoh ka kot jong ki paitbah ka thaiñ Rambrai, ka West Khasi Hills bad jong ka jylla hi baroh kawei.
