Pynsangeh ka AKMTTA ïa ka jingkhang rung ki kali Assam shaduh ka 10 tarik Nailur

Shillong, Nailar 23 : Ka All Khasi Meghalaya Tourist Taxi Association (AKMTTA) ka la pyntip ba kan pynsangeh shuwa ïa ka jingkhang ïa ki kali Assam ban rung sha Meghalaya haduh ka 10 tarik Nailur hadien ka jingkular ka Sorkar ban khot jingïalang lang ïa ki seng ki kali tourist ka Assam ban ïapynbeit ïa ki jingdawa ka Seng.
Ka AKMTTA ka la rai ïa kane hadien ka jingïalang ba kyrkieh, kaba la lum da u Symbud Myntri Rangbah u Bah Sniawbhalang Dhar ha ka sngi U Blei ha Shillong.
U Symbud Myntri Rangbah ula pyntip ba ka seng ki kali Tourist ka Jylla ki la mynjur ban sdang leit kamai biang sha Assam tad haduh ka 10 tarik Nailur bad ban sangeh noh ha ka ban khang ïa ki kali Assam ban rung sha Jylla.
ïa kane ka jingïalang la pynlong hadien ba kine ki seng ki la ïeng skhem ha ka nongrim ba kin nym leit rung shuh sha Assam bad rai ban nym shah ïa ki kali tourist na Assam ban wan rung sha Jylla, hadien ka jingkynnoh shah pyndik ha Assam namar ki kam thombor kiba jia ha Shillong ha ka 19 tarik Nailar.
U Bah Sniawbha ula ong “Hadien ka jingïakren kaba sani bha, ngi la shim ba ka long ka jingïalang ka ba seisoh. Ki seng kila pynpaw ïa katto katne ki jingeh ba ki la ïatakhuh ha kine ki khyndiat bnai bad snem tang mar syn rung sha Assam. Ngi la sngap ïa ki jingeh jong ngi bad ki jingsngewkhia jong ki, ki dei hok kiba shisha”.
Ula pynbna ba ka Sorkar kan sa lum ïa ka jingïalang ban ïadon lang ki seng kali tourist ka Assam ha shuwa ka 10 tarik Nailur ban pynbeit ïa kiei kiei baroh.
“Ngi la rai ba hashuwa ka 10 tarik Nailur, Ngan khot ïa ka jingïalang ha ka kyrdan jong nga bad ki Commissioner ka Transport ka Assam bad Meghalaya, ha ka jingïadonlang ki dkhot jong baroh ki seng kali tourist na baroh ar Jylla, bad ngin pyrshang ban pynbeit ïa baroh ki jingeh ba la mad da ki nongñiah kali haba ki rung sha Guwahati bad kiwei pat ki bynta jong ka Assam” ula ong.
Haba pynpaw ba baroh ar Jylla ki la poi sha ka jingïasngewthuh jingmut ban wanrah pat ïa ka jingsuk, ula ong “Ki la don ki huri hura ha kine ki khyndiat sngi ba la leit khamtam hadien ki jingjia ha ka 19 tarik Nailar. Hynnin ngi la leit sha Assam bad ngi la poi sha ka jingïasngewthuh jingmut ba dei ban wanrah pat ïa ka jingsuk. Ki la don shibun ki jingjia bad jingpyndik ha Assam hynrei ngim long pyrshah ïano ïano ruh. Ngi kwah ba ka Sorkar kan shim khia bha”.
Halor ka jingpakhang surok, u Bah Sniawbha ula ong “Ngi la ïamynjur lang bad ngin bteng biang ban ïarung ïamih kumba ju long naduh mynta ka sngi haduh ka 10 tarik Nailur. Ngin sa ïakren bad ka liang na Assam bad kyrmen ba ngin ïoh ïa ka jubab kaba sngewtynnad na baroh ar Jylla”.
Ula bynrap “Naduh kane ka khyllipmat, ngin sa ïaleit ïawan laitluid kumba ju long. Hadien ka 10 tarik Nailur, ngin sa shim ïa ka rai”.
Haba kylli la ka Assam ka la weng ïa ki jingpyrrkhing, u bah Sniawbha ula ong “Ka khubor ba ïoh na ka liang ka Assam ka long ba kila weng ïa ka pakhang surok”.
Haba ïadei bad ka jingsiew bai lutksan ïa ki kali ba shah pynjulor ha ka 19 tarik Nailar, ula ong “Ka Sorkar kan sa shimkhia ïa kane kat kum ka aiñ. Ngi la pan ïa ki jingtip ba bniah halor ka jingdon ki kali kiba shah pynjulor na ka Assam bad na Jylla ruh kumjuh”.
Haba kren hadien ka jingïalang, u President ka AKMTTA u Bah Ricaldinus Dohling ula ong “Ka Sorkar ka la pan por 10 sngi na ngi. La kular ha ngi ba hapoh ka 10 tarik Nailur, kan sa khot ia ki nongïalang jong ki seng kali tourist na Assam bad ki Ophisar ka Tnad Transport na Assam khnang ba ngin ïashong bad ïakren ïa ki jingdawa jong ngi”.
U ïathuh ba ka AKMTTA ka la dawa ba ki kali kamai Tourist na Meghalaya kin nym ïaid kamai shuh sha Assam bad ba ki kali Assam ruh ki dei ban pynkut ïa ka kamai ha Jorabat.
“Halor kane, hadien ka 10 tarik Nailur, ngin sa ïakren bad ka Sorkar. Na ka liang jong ngi, ngim pat lah ban ong kaei ka rai ka ban mih, la ka Sorkar kan pynhun ïa ngi ne em hapoh ka 10 tarik Nailur. Ngin sa shim rai hadien katei ka jingïalang” ong u bah Dohling.
Haba ka Seng ka la pynsangeh ïa ka jingkhang wan rung ki kali Assam sha Meghalaya, ula ong “ïa mynta, ngin pyllait shuwa shipor. Ngin sa batai ïa ki para nongñiah kali ha Damsite halor ka rai ba mih mynta ka sngi ban aipor 10 sngi ïa ka Sorkar bad kyrmen ba kan don ka jingmih kaba sngewtynnad”.
“Tad haduh ka 10 tarik Nailur, ki kali na Assam bad Meghalaya kin ïaid kamai biang kumba ju long” ula bynrap.