Jowai, Nailar 21: Ka Jaiñtia Photographers & Videographer Association (JPVA) kum ka dak jong ka jingrekhe dap shisnem ka jingïaid lynti kala pynlong ïa ka Jaiñtia Photo & Video Fest 2026, kaba la sdang naduh 19 tarik bad pynkut mynta ka sngi 21 tarik u Nailar, 2026 ha Chutwakhu Indoor Hall Jowai.
Ha ka jingïalang ba la pynlong mynta ka sngi thohdieng na ka liang u Myntri jong ka sorkar jylla u ma Wailadmiki Shylla ula long kum u kongsan, haka jingdonlang u MLA ka Khliehriat u ma Kyrmen Shylla kum u symbud kongsan, nalor kiwei de kiba la shah khot sngewbha, ka kynhun Photography Club Dimapur, lem bad ki khynnah skul.
La ïoh ïa ki kyntien pdiang na u President ka JPVA ma Jomanson N Passah, uba la pynnsgew ïaka jingïaid lynti jong ka seng kaba dang shisnem mynta, ban kyntiew ïa ki lad jingtip na ka bynta ki nongshong dur bad ki nongring dur, ula pynsngew ruh ïa ki jingeh kiba ka seng ka ïa kynduh bad kyntu na ka sorkar ba kan ïarap katba lah lyngba ki skim bapher bapher bad ki lad ïohkam ha ki prokram sorkar.
Katba u ma Ruhipaia Phawa (Vice President) ula pynsngew ïa ka history lyngkot jong ka JPVA kaba la seng haka 21 August 2025 bad mynta ka sngi kala dap shisnem pura ban shakri ïa kiba bun ba lang lyngba ki dur bad ki Video kiba lah ban pynsan nam ïa ka pateng ban wan bad ban kyntiew ïa ka jingriewspah jong ka mariang hapoh ka thaiñ Jaiñtia Hills.
Shuh shuh ula pynsngew lyngba kane ka seng kila ïoh ban pynlong ïa ka prokam ba nyngkong haka 1 tarik March 2026 ha kaba la don haduh 36 ngut kiba la wan ïashim bynta ha ki jingïakop shon dur bad ring Video.
Katba na ka liang u Wailadmiki Shylla haba ai jingkren ula ai ka jingïaroh ïa kane ka seng kaba ïaid lynti dang shisnem mynta hynrei kala lah ban pynlong ïa kum kane ka Festival kala ai mynsiem ïa kiwei de ki khun samla ban pynleit jingmut ha kane ka kam.
Ula pynsngew katkum ka jingïaid ka por dei ban ïabud lang ïa ki jingdawa jong ka juk stad mynta da kaba pyndonkam ïa ki tiar technology ba thymmai, ula kyntu ruh ïa ka Association ban kan dang ïaid shakhmat ban ai jinghikai ïa kiwei de ha kane ka liang. Da kaba kyntu ban ïatreilang da kaba wan mih sha ka sorkar na ka bynta ki lad jingïarap lyngba ka Skill Meghalaya, ka Hello Meghalaya, ka Prime nalor kiwei de kiba la sorkar kala wanrah sha ki paidbah.
Ha kaba ïadei bad ka National Games ula kular ban ïakren bad ka sorkar na ka bynta ki kam ba ki trai jylla ki dang lah ban leh yn ïakhun ban pynïoh ïa ki bad kaba donkam eh ka long ban pynbha ïalade khnang ban long kaba itynnad bad kaba pynhun ïa baroh.
Kum ka lad ban ai jingkyrshan ïa ka Jaiñtia Photographers & Videographer Association (JPVA) na ka liang u myntri ula aiti ha ki nongïalam ïaka order jingïarap pisa lyngba ka tnad Sport kaba long 3 lak 50 hajar tyngka. Ha kane ka sngi la ot ruh ïa u cake jong ka jingdap 1 snem pura.
Ha kane ka sngi la sam ruh ïa ki khusnam sha ki nong jop haka Photo Display, Video Screenings, la pynlong ruh ïa ka Workshop bala ai jingbatai na ka Nikon, Cannon, Lumix bad ka Sony, ka Musical Evening bad ka Photo Exhibition. La wanrah ruh ki stall bapher bapher naduh ki jingbam bad ki tiar ki tar ba bun jait.
