Shillong, Nailar 21 : Ar tylli ki ïing ki la shah pynjulor ha ka jinghiar thma ki hati khlaw ha ka shnong Dakupara kaba don ha South West Garo Hills ha ka step sngi Thohdieng.
Katkum ka jingïathuh da ki heh sorkar, kane ka la jia ha ka por 3:00 baje ei ei mynstep ba kitei ki hati khlaw ki leit ban pynjulor ïa ka ïing shetja kaba dei jong u Remol Hajrong.
Tangba ym shym la don satia mano mano ba mynsaw ruh ha katei ka jingjia tangba ka ïing pat ka la julor lut.
Ha kawei pat ka jingjia ha katei hi kajuh ka shnong, kawei ka ïing sah kaba dei jong u Sonutibala Hajrong ka la ngat lang ha ka jingshah pynjulor.
Na ka liang u Gram Sevak ha kane hi ka step u la hiar ban leit tohkit halor kane ka jingjia ban peit ïa ka jingshah pynjulor.
Ha kajuh ka por ka ophis u District Disaster Management Authority (DDMA) ki dang lum jingkhein haba ïadei bad ka jingjulor bad ki sienjam ban ai jingïarap kumba dei ka rukom.
Na ka liang ki bor distrik ki la kyntu ïa ki nongshong shnong ha kito ki jaka ba don ki hati khlaw ba ki dei ban long kiba husiar bad peitngor bad pyntip mardor haba don ka jingïaid jong kine ki hati khlaw.
