Nongpoh, Nailar 21: Ka Ri-Bhoi Synod College kaba don haka shnong Umsaitsning, Ri-Bhoi District mynta ka sngi kala pynkup burom ïa kumba 21 ngut ki samla kiba la pass bha bad kiba la pyndep ïaka Graduate, hapdeng ka jingiphuh iphieng haka Graduation Day bala pynlong ha auditorium hall jong katei ka college.
Ha kane ka sngi ka jingpynkup burom ïa kitei ki samla, u Bah Mayral Born Syiem MLA ka Nongpoh u la long u kongsan haka jingdonlang u Bah Dipul Ryntathiang Chairman barim ka Umsning Town Durbar, u Rev. HL Marsing President ka Governing Body, u Rev PS Tmung Principal, ka kong Deigracia Lyngkhoi Vice Principal, ki nonghikai, ki samla pule lem bad ki kmie ki kpa.
Haba kren kum u Kongsan ha kane ka sngi, u Bah Mayralborn Syiem u la ong ba ka Graduation Day ka dei ka sngi kaba kyrpang bad kaba pyni ïa ka jingjop jong ki samla pule hadien ka jingïaid lynti ha ka pule puthi.
U la pynshlur ïa ki samla pule ba kin ym kut tang ha ka jingjop kaba ki la ioh mynta, hynrei kin peit shakhmat bad buh ïa ki thong na ka bynta ka lawei. U la kyntu ruh ïa ki samla ba kin pyndonkam hok ïa ka jingnang jingstad bad ki sap kiba ki la ïoh ban noh synñiang sha ka imlang sahlang bad sha ka jylla hi baroh kawei.
