Nongstoiñ, Nailar 21: Ar tylli ki kali Sorkar jong ka West Khasi Hills kiba la pynieng ha ka jaka set kali kiba shngaiñ jong ki ophis, ki la shah thang ha ki runar ha ka miet sngi palei haduh ba kin dang ingkhong khaid. Nalor nangta ka don ruh ka jingshah kawang petrol bom ha ki lai tylli ki jaka kiba dang hap hapoh ka jingkhmih ka Nongstoiñ Police Station.
Napdeng ki kali ba shah thang, kawei ka dei ka Mahindra Marshal Max ba don u nombor ML01-4130, kaba pynieng ha Ophis u BDO Nongstoiñ. Katba kawei pat ka dei ka Maruti Gyrsy ML01-6963 ba pynieng ha IB PWD Nongstoiñ. Kine baroh ki la shah thang haduh da ingkhong syndon.
Katkum ki tyllong khubor na ki heh Pulit ka District, la ïathuh ba ka la don ruh ka jingkawang petrol bom ïa ka Ophis u SE PWD kaba don ha ka shnong Mawkhlam Nongpyndeng. Hynrei, donbok ba ka jingjulor ka long kaba rit, ha kaba ka skylight ka la julor malu mala bad dei da ka jingmih kloi u chowkidar, la lah ban tehlakam ïa ka ding shuwa ba kan pynjulor.
Shuh shuh, ki pulit ki la ïathuh ruh ba u Assistant Commissioner ka Mawshynrut Civil Sub-Division Dr L Pohshna, u la pyntip ba ka Ophis u SDO, Mawshynrut Civil Sub-Division ka la shah kawang petrol bom ha ki runar ha ka miet sngi palei.
La ong ba ïa kane ka jingjia la lap da u chowkidar ha ka step sngi thohdieng bad ka jingjulor ka long tang ïa ka jingkhang ïit bad ki shuki.
Nalor nangta, ki Pulit ki la ïoh pdiang ïa ka ejahar na kine ki tnad halor kine ki jingjia bad ka jingtohkit mynta ka la ïaid shakhmat ban lap dien ïa ki briew kiba donkti.
