Nongpoh, Nailar 21: La don katto katne ngut ki briew kiba la pyrshang ban wanrah jingkular bad pynthud ïaka shongsuk shongsaiñ haka jingïakhih jong ki nongñiah kali kamai na Assam kiba la khang ïaki kali Meghalaya ha Jorabat, kila shah beh noh na katei ka jaka ba ïakhih bad shah rah haki pulit Assam.
Na ka liang ki nongñiah kali kamai na Assam kila lap ruh katto katne ngut ki briew kiba la phong ruh da ki helmet da ka jingthmu ban pynmih jingkulmar, bad aiti haki pulit namar kum ka kynhun ki nongñiah kali kamai kim kwah ban mih kano kano ka jingkulmar ne jingjia ba sngewsih lait noh tang ka jingkhang ïaki kali ban rung sha Assam.
Shuh shuh kitei ki nongïakhih ha Jorabat kin bteng ban khang ïaki kali tad haduh ba ka sorkar Meghalaya kan ïakren sngewthuh bad poi sha ka miej ïakren.
