Pan jingpynshai ka JAC ba pynkynriah ïa ka ophis treikam ba shipor ka C&RD Block na Wapungskur sha Khliehriat

Khliehriat, Nailur, 13: Ka Joint Action Committee (JAC) Wapung C & RD Block, kaba kynthup ïa ka Dorbar Shnong Wapung-skur bad Dorbar Shnong Wapungshnong ha ka sngi ba Ar ba la lah ka la pynpaw ka jinglyngngoh bad dawa pynshai na ka sorkar halor ka jingrah jyndat biang jong ka sorkar ïa ophis treikam ba shipor jong ka Wapung C & Block na Wapungskur sha Khliehriat khlem da tip ïa ki daw lane kynjoh ktien ïa ka JAC Wapung C & RD Block, ïa ka Dorbar Shnong Wapungskur bad ïa ka Dorbar Shnong Wapung-shnong kiba la ïa don bynta naduh ba sdang bad haduh ba wanrah ïa katei ka Wapung C & Block na Khliehriat sha ki thaiñ Wapung.
Ka JAC ka la ong ba ha ka jingshisha kumba ka long mynta, namar bym pat dep ïa ka jingtei ïa ka ophis treikam ba pura jong ka Wapung C & RD Block ha ka jaka kaba ka shnong Wapungskur bad shnong Wapungshnong ki la ai sngewbha sha ka Sorkar Jylla na ka bynta katei ka ophis paidbah, bad la rah shwa shipor ïa ka ophis treikam ba shipor jong katei ka ophis ha kawei ka ïing kaba don ha ka shnong Wapungskur ha u Lber, jong u snem 2022.La ong ruh ba naduh utei u snem haduh ka 7 tarik mynta u bnai katei ka ophis ka treikam ha katei ka jaka ka la ai ka jingshakri ïa u paidbah jong ka block.
Hynrei kyndit ha ka 8 tarik mynta u bnai la lap ba ïa katei ka ophis treikam la rah noh biang sha ka Nongbah Khliehriat khlem da pyntip sha ka JAC, Wapung C & RD Block lane sha ka Dorbar Shnong Wapungskur bad ka Dorbar Shnong Wapungshnong halor kaei ka nongrim ba hap ban pynkynriah.
Ka JAC ha u kyrwoh lyngba u Bah Hercules Mutyen Secretary ka la ong ruh ba ha katei hi kajuh ka sngi ba rah ïa ki tiar ki tar jong katei ka ophis treikam, ki nongïalam jong JAC ki la pyrshang ban wad ïa ka daw halor ka jingrah biang ïa katei ka ophis kaba la don mynta la shisnem shiteng ha Wapungskur da kaba pyrshang ban phone ruh sha u BDO ba dei peit ïa katei katei ka block, hynrei u khlem shim satia ïa ka phone bad la wad jingtip biang ruh da kaba kylli da ka message lyngba ka whatsapp hynrei ïa kata ruh u khlem jubab satia.
“Ka long kaba sngew lyngngoh shibun kumno ka Wapung C & RD Block ka ophis kaba ka ki ar DS Wapungskur bad Wapungshnong, ki la ïa don ia ka bynta kaba khraw ha ka ban wanrah ïa katei ka ophis sha ka thaiñ Wapung da kaba ai ei ruh ïa ka jaka kaba heh bha na ka bynta ban tei ïa ka ophis treikam bad jaka sah ba paka jong katei ka block, hynrei ynda la rah biang ïa ka na ka thaiñ Wapung sha Khliehriat, ka Dorbar Shnong jong kitei ki ar shnong bad ka JAC Wapung C & RD Block kim don jingtip ei ei shuh,” buh jingkylli ka JAC.
Kumta halor kane ka jingleh ka JAC ka la ong ba ka suba jur ba ka lah ban don kaei re kaei kaba shalyndet halor kane ka jingleh jong ka sorkar. Kumta ka JAC Wapung C & RD Block, ka DS Wapungskur bad ka DS Wapungshnong bad ki paidbah baroh ki dawai ban ïoh ka jingpynshai na kaei ka daw pat ba la rah biang mynta ia katei ka ophis treikam ba shipor jong katei ka block sha Khliehriat.
Shuh shuh ka JAC ka la pynpaw ruh ba kan ym shong klikti ha kaba ïadei bad kane ka phang, hynrei kan ïai buddien ïa kane tad haduh ba kane ka kam kan da shai kdar bad ruh tad haduh ban da wanrah biang ïa katei ka ophis treikam ba shipor jong ka Wapung C & RD block ha Wapungskur hi, ka jaka ha kaba ka ophis treikam ba pura jong katei ka block kan don katkum ba la pynbna da ka sorkar.