Shillong, Nailur19: Palat 3000 tylli ki laisen suloi ha East Khasi Hills ki dang hap ban pynthymmai, la pyntip u Deputy Commissioner u Abhilash Baranwal namar ba u kyntu ïa kiba don laisen ban wan shakhmat ban pyndep ïa ka jingpynthymmai hapoh ka por ba la buh da ka bor pyniaid district.
U Baranwal u la ong ba ki bor pyniaid ki la ithuh ïa ki case kiba dang sahteng na ki rekod jong ka bad ki la pynmih ïa ki jingpynbna sha ki nongbat laisen ba kin wan ban pynthymmai hapoh ka por ba la buh, kata haduh ka 20 tarik u Nailur.
Ka bor pyniaid district ki la buh ruh ïa ka thup jong ki laisen tiar kiba la kut por ha ka website jong ka, kaba ailad ïa ki nongbat laisen ban peit la ka jong ki ka la kut por ne em.
Katkum u Baranwal, palat 400 ngut ki nongbat laisen ki la mih shakhmat ban pynthymmai ïa ki laisen ha kine ki 20 sngi ba ladep. “Ngi dang ap ïa kiwei pat”, u la ong bad bynrap ba ka bor synshar ka lah ban pynjlan sa shi taiew ne ar taiew.
U Baranwal u la ong ba ka jingleh kaba kham tyngeh ka lah ban bud pyrshah ïa ki nongbat laisen kiba ka jingpynthymmai jong ki ka la sahteng ha ka por kaba lah slem bha.
“Khamtam ïa kito ki license sukoi kaba la sahteng kiba khlem pynthymmai la palat ar snem, lai snem, ngin bthah ïa ki pulit ba kin leh ïa kaba donkam”, u la ong.
U Baranwal u la ong ba ki don ruh ki khep ba ym shym la pynthymmai ïa ki laisen suloi haduh 15 snem.Hynrei kum kine ki nongbat laisen ki dang lah ban pan ban pynthymmai, katkum ka jingsiew ïa ka kuna kaba dei ban siew.
