Palat 18 spah ngut ki nongbylla mynder ïoh bat ki Pulit ka Anti-Infiltration Directorate West Garo Hills

Shillong, Naiwieng 02: Kum ka jingïaibteng ka jingtalasi bad khynra jong ki pulit ka Special Squad ka Anti-Infiltration Directorate kaba West Garo Hills ka la lam sha ka jingïoh jingithuh bad ïoh bat ïa palat 1,800 ngut ki nongbylla mynder ha kane ka shisnem, ha kaba kane kadei ruh kum ka jingpyrshang ki bor ka aiñ ban pynkhlaiñ ïa ka jingkhanglad ïa ka jingkynrei ki kam beaiñ bad ki nongtrei kiba khlem pat pynrung kyrteng ha ka district.
Hapdeng u bnai Naitung u snem 2024 bad haduh ka 29 tarik u bnai Risaw, 2025, ki pulit ki la lah ban ithuh haduh 554 ngut ki nongbylla ba khlem pat register, kumba 1,240 ngut pat ki nongtrei ba khlem register, bad kumba 245 ngut ki nongbylla kiba na ka shnong kiba trei ha ki jaka tei bapher bapher bad kumjuh ruh ha kiwei pat ki thaiñ kiba duna ki lad jingïada. Ïa kine ki jingtalasi bad khynra la pynlong da ka jingïatreilang ka tnat Labour bad kiwei ki tnat treikam.
Na ka liang ki heh pulit ka District ki la ong ba kane ka jingtalasi ka la ïarap ban ïoh bat ïa bun ngut ki suba poi wir kiba khlem pat register bad ki bym don ruh ïa ki kot ki sla kiba dang treikam bad kiba shisha. Ki pulit ki la banjur ba kin pyrkhing bha ïa ki aiñ bad ba kin pynshitom ruh ïa kino kino lada lap ba ki pynkheiñ pyrshah ïa ki labour ne immigration rule.
Ki bor pulit ki la kyntu ruh ïa ki nongai kam bad ki contractor ban pynthikna ba ki dei ban ai ki jingpynshisha kiba biang bad ban pynrung kyrteng ïa baroh ki nongtrei ha shwa ba kin ai kam ïa ki.
La bthah ruh ïa ki paidbah ba kin pyntip lada ki ïohi ne lap ïa ki briew kiba ishankhmat ba ki leh ïa kino kino ki kam ne ka jingdon jong ki nongbylla kiba khlem ki kot ki sla kiba biang bad ban pyntip ruh sha ki police station kiba don hajan, kumjuh ruh sha ki outpost, ne sha ka Police Control Room kaba ha Tura.
Ki heh ophisar ki la pynthikna ba kane ka jingkhynra bad talasi ïa ka jingwan ki briew ba nabar (anti-infiltration drive) kan ïaibteng manla ka por ban pynthikna ba kan don ka jingaikam kaba ïaid katkum ka aiñ bad kumjuh ruh ban pynneh ïa ka jingshongsuk shongshngaiñ ha baroh kawei ka district.