Kolkata, Naiwieng 02: Laingut ki shynrang ki la shah kem halor ka jingshah kynnoh ba ki leh beijot ïa kawei ka khynnah ha Kolkata ha ka thaiñ Dum Dum. Ka tyllong khubor na ki pulit ka ïathuh ba kane ka khynnah skul kaba dang 14 snem ka rta kadei kaba dang shong ha ka klas 7 ka la mih na la ïing ban leit khreh kot ha ka janmiet jong ka sngi Saitjaiñ ha kaba kane ka jingjia ka la jia.
Ïa kitei kiba la shah kynnoh la ithuh kyrteng kum u Sanju Saha, Vicky Paswan, bad Rajesh Paswan.
Ka khubor na ki pulit ka ïathuh ba katei ka khynnah ka la ithuh ïa uwei na kiba la shah kynnoh. Ki la don katto katne por ha kawei ka park, ha kaba hadien jong ki, la don sa arngut kiwei pat ki briew kiba la wan lang. La kynnoh ba kitei ki 3 ngut kiba la shah kynnoh, da ka bor ki la rah ïa katei ka khynnah ha kawei ka ïing kaba ha Motilal Colony da ka e-rickshaw. Katkum ka jingujor ba la phah sha ki pulit la ïathuh ba katei ka khynnah ka la shah pynshitom bad shah leh beijot ha katei hi ka ïing.
La ïathuh ruh ba katei ka khynnah ka la lait phet bad wan phai sha la ïing ha ka por mynmiet ha ka jinglong jingman kaba la shitom ka met ka phad. Katei ka khynnah ka la ïathuh shaphang katei ka jingjia sha la ki kmie ki kpa, ha kaba na ka liang ki kmie ki kpa pat ki la leit ban ujor sha ki pulit ka Dum Dum Police Station.
Halor ka jingujor, ki pulit ki la leit ban kem noh ïa kitei ki 3 ngut kiba la shah kynnoh bad pynngat ïa ki hapoh ki kyndon bapher bapher jong ka Protection of Children from Sexual Offences (POCSO) Act bad ka Bharatiya Nyay Sanhita, kaba kynthup ruh ïa ka jingleh beijot bad ka jingset da ka bor ïa katei ka khynnah ha katei ka ïing.
Na ka liang ki pulit ki la pynlong ka jingtohkit haduh 5 sngi ïa u Saha bad la phah pat ïa ki Paswan sha ka judicial custody kaba shi sngi.
Halor kane ka jingjia, na ka liang ki nongtrei ka seng BJP ki la pynlong ïa ka jingïakhih pyrshah ïa kane ka jingjia shabar jong ka Dum Dum police station ha kaba ka la dawa ba dei ban pynshitom da kaba tyngeh pyrshah ïa kitei ki runar.
