Ïoh phong ka samla Marthrika ïa ka Pansngiat Miss Shillong 2025, ka samla Wandaphi ha ka kyrdan ba ar

Shillong, Naiwieng 02 : Ka samla Mathrika Choudhury ka la ïoh ban phong ïa ka Pansngiat ‘Thei Ba Bhabriew’ tam jong ka Shillong mynta u snem ba tip ruh kum ka pansngiat Miss Shillong 2025 ha ka lympung ïakob thei bhabriew kaba shongshit bha kaba long ha ka janmiet sngi Saitjain ha Soso Tham Auditorium ïa kaba la pynbit pynbiang da ka Fashion Society Shillong (FSS).
ïa ka khusnam kaba ar (1st Runner Up) ha kane ka rynsan ïakob thei bhabriew la ïoh ban khur da ka samla Wandaphi Kharbamon katba ha ka kyrdan kaba lai (2nd Runner Up) pat la ïoh ban khur da ka samla Jollyne A Lyngdoh.
Ïa ka khusnam 3rd Runner Up pat la ïoh da ka samla Nimrat Ranhotra bad ïa ka khusnam 4th Runner Up la ïoh da ka samla Rimika Shylla.
Baroh lang ki la don haduh 19 ngut ki thei bhabriew kiba wan ban shim bynta ha kane ka lympung kaba heh bad shongshit bha khamtam lei lei haba la poi sha ka kylla kaba khatduh kaba sah sa tang san ngut ki thei bhabriew kiba ïaknieh ïa ki kyrdan bapher bapher ha kane ka rynsan ïakob.
Ka lahduh ha kane ka lympung ka ïoh ruh ban khur ïa ka song pisa kaba 1lak tyngka, katba ka samla ba wan ha ka kyrdan kaba ar ka ïoh 75 hajar tyngka bud pat sa ka khusnam kaba lai kaba long 50 hajar tyngka.
Ha kane kajuh ka sngi, la sam ruh ïa ka khusnam ‘Viewers Choice Award’ ha kaba ki paidbah ki jied da kaba vote lyngba ki rynsan social media. Kumta, ïa ka khusnam ‘Mawphor – viewers choice award’, la ïoh da ka samla Rimika Shylla. Katba ïa ka khusnam ‘Shillong Times – viewers choice award’ la ïoh da ka samla Jollyne Ancie Lyngdoh.
Ha kajuh la sam ruh ïa kiwei ki khusnam ba kyrpang sha ki nongshim bynta (Subtitle Winner) kiba kynthup ïa ka khusnam Miss Tantalising Tresses kaba la ïoh da ka samla Elizabeth Lyngdoh. Nangta ïa ka khusnam Miss Silky Skin la ïoh da ka samla Agnes Lyngdoh, ïa ka khusnam Miss Alluring Smile la ïoh da ka samla Niha Hajong. Ïa ka khusnam Miss Talented la ïoh da ka samla Wandaphi Kharbamon, katba ïa ka khusnam Miss Sparkling Eyes la ïoh da ka samla Isadelia Bareh bad ïa ka khusnam
Best Recycled Outfit la ïoh da ka samla Bashika Warlaitthma.
La donlang ruh ha kane ka sngi naduh u Adviser jong ka tnad Social Welfare ka sorkar jylla Bah Paul Lyngdoh kumjuh u Principal Secretary ka tnad Arts & Culture ka sorkar jylla, Bah FR Kharkongor nalor kiwei kiwei.
Kane ka rynsan ïakob mynta u snem ka la long kaba shongshit bha khamtam da ka jingrisa bad kynhoi ki paidbah kiba la wan ban kyrshan ïa la ki jong ki jong ki thei bhabriew kiba wan ban ïaknieh ïa ka pansngiat Miss Shillong 2025.