Shillong, K’lyngkot 16: Katba ka samoi jong ka jingjied ïa ki nongmihkhmat ka la nang jan nangjan la ïohi ruh ba ka jingïarung ïamih na kawei ka party ka la jia man ka sngi.
Ha ka sngi Thohdieng kumba 1000 ngut ki kynthei na ki party kiba pher bapher ki la leit ban pynïasoh sha ka BJP ha ka jingïalang kaba la pynlong ha Upper Mawprem, Nongsohpoh, Shillong. Ïa kine ki kynthei kiba pynïasnoh sha ka BJP la pdiang sngewbha da u Union Minister of State ba peit ïa ka tnat Electronics and IT, Skill Development and Enterpreneurship, u Shri Rajeev Chandrasekhar, u State President ka party u Shri Ernest Mawrie bad kumjuh u Myntri ka sorkar jylla u Bah Sanbor Shullai.
Haba kre pdiang sngewbha ïa kine ki kynthei, u Rajeev Chandrasekhar u la ong ba ka jingwan pynïasnoh jong kine ki palat 1000 ngut sha ka party kamut ba ki la pynïasnoh lang ha ka jingïakhun ban kynjoh sha ka India kaba u Myntri Rangbahduh ka ri u Modi u angnud ban ïohi ïa ka ri.
“Ka thong u Modi ka dei ban wanrah ïa ka roi ka par, ka bit ka biang ki nongshong shnong ka ri bad mynta ba phi snohkti bad ngi kamut ba phi don lang h kajuh ka thong bad u Modi,” u la ong.
U la ong ruh ba napdeng ki party baroh kaba khlem peit shiliang khmat la riewlum ne rit paid ba ka dei tang ka BJP ha kaba ka thong treikam ka dei beit ka Roi ka Kiew jong baroh ha ka ri.
