Ka pule puthi ka la ngam ha ka jylla lah ban pyllait im lyngba ka VPP : Dr Batskhem

Shillong, K’lyngkot 16: U nongai ktien jong ka Voice of the People Party (VPP) uba dei ruh u nonghikai ha Synod College Shillong u Dr Batskhem Myrboh, ha ka sngi Nyngkong haba ai jingkren ha ka jingïalang paidbah jong ka party, u la ong ba ka jinglong ka pule puthi ha ka jylla kam dei shuh ba ka don ha tmir riat ban hap noh ne ban khyllem noh hynrei ka la don hapdeng duriaw ban jan ïap jyllop.
U Dr batskhem Myrboh u ong ba lada peit na ki liang baroh jong ka jinglon jingman ka pule puthi ka la khyllem bad don hapdeng duriaw bad ba lada bakla jied ïa ki nongsynshar ha kane ka elekshon kaba mynta kan ïap jyllop syndon.
“Phin nujor bad ka jinglong ka pule puthi ha Bihar ruh ngi la kham ran sha trai da bun bun shah bad ban kyntiew biang ïa ka burom kaba la duh ka donkam ïa ka seng kaba don ka thong bashida ban don ha ka sorkar khnanag ban ïoh pynlait im ïa ka pule puthi bad nga nud ban ong ba dei tang ka VPP kaban lah ban pynlait im na ka jingngam jyllop ka pule puthi,” u la ong.
Haba kren halor ka rukum synshar khadar, u Dr Batskhem u la ong ba ym shuh tang kane ka sorkar kaba mynta kaba thaw ki aiñ kiban khñiot ïa u duk hynrei wat ki sorkar kiba mynshuwa.
“Phin peit ïa ka polsi ki sorkar baroh ki long beit pyrshah ïa u ba duk namar la katto katne snem mynta ka sorkar kam ai permit thymmai shuh ïa ki taksi ban kamai ha sor hana ba ki pynkhapngiah ka ka nongbah hynrei hato ki kali shimet kim pynkhapngiah mo? Tang kawei nga tip ba lada ai permit thymmai uban myntoi u dei u paidbah ka jylla ym ki heh saipan,” u la ong.
Shuh shuh u la ong ba ka sorkar ha ka jingñiah kali jong u ïa ka kali private la palat 10 snem hynrei shisien ruh um pat ju mad ban shah talasi kot kali katbva ïa ki kali kamai na ka por sha ka por ka sorkar ka talasi ïa ki kot ki sla jong ki.
Ha kane ka sngi ka Aibandaplin L Nonglait ka kyrtong na Mylliem ha ka jingkren jong ka ka la ban jur ba ka jingpynkha hi ïa ka VPP ym namar ki nongïalam ki donkam spah ne bor hynrei namar ki sngewkhia ban ïohi ïa ka jinglyngkrang ka synshar khadar ban ka jingiduh jingkyrmen ïa ka lawei ka jaidbynriew.
Ka la ong ba ka jingïakhun kaba ka VPP kan hap ban ïakhun ka dei na bynta ki samla pule ba duk, ki samla khlem kam khlem jam, ki long iing kaba im na ka rep, ki nongbylla.
“Lada ngin nujor kaei kaba kum ka jylla ngi kynjoh ha ki 50 snem nga sngew lehraiñ shibun namar ngi long beit kiba sha trai duh bad dei na kane ka daw ba ka jingïatiplem jong nga kam shah satia ba ngan khaprip ki khmat ne leh bym ïohi kat kane ka saw ka sian ka jylla,” ka la ïathuh.
Shuh shuh haba kren ha kane ka sngi u Babu Mayborn Lyngdoh u kyrtong ka party na Pynthorumkhrah u la ong ba ka jingmih ki jingkynnoh ba ka jingmih jong u ban ïa aireng ha kane ka kynti kaba mynta ka la dier por palat u la pynshai sha ki paidbah da kaba ong, “Ngam pat dier por hynrei nga dang biang bha ka por ban mih namar ka jingmih ka jong nga ka dei namar ka jingiduh jingkyrmen palat bad dei ynda nga lap ba kane ka party ka long ka jingkyrmen nga rai ban pynïasnoh sha kane ka party. Kiba ong ba nga dier por kynmaw kane ka wei ba phim pat shym la thep vote bad ka por ba phin rai ka dang biang bha.”
Ha kane ka sngi la ïoh ruh ka jingkren na kiwei pat ki kyrtong kiba kynthup ïa u Bah Avner Pariat u kyrtong na East Shillong, u Dr Ricky AJ Syngkon kyrtong na Umsning bad kiwei kiwei ki nongïalam ka party.