Shillong, Nailur 24: Ka Confederation of Meghalaya Social Organizations (CoMSO) ha ka sngi palei ka la pynpaw ïa ka jingpyrshah jur ïa ka hukum jong ka tnat Finance Ministry ban plie ïa ki bank kynthup ïa ki bank ha ki thaiñ nongkyndong ha ka Sngi U Blei kata ha ka 27 tarik Nailur ha shwa ka jingïakhih jong ki bank ha ka ri baroh kawei naduh ka 28-30 tarik Nailur.
U General Secretary ka CoMSO u Balkarin Ch Marak u la ong ba ïa katei ka hukum la pynmih khlem da pyrkhat ïa ka jinglong jong ka Meghalaya kaba bun ki riewngeit Khristan, ha kaba ïa ka Sngi U Blei la pynlong kum ka sngi mane Blei bad ka sngi ïa donlang shi ïing shisem.
U la ong, “Ka jingsuk ha ka rukom synshar kam lah ban pynduh pyndam ïa ka jingngeit ki nong shong shnong haka niam bad ka imlang sahlang jong ka Meghalaya,” bad bynrap ba ïa kane ka rai la shim khlem ka jingïamir jingmut bad kiwei ki Jylla hapoh ka ri.
Ka CoMSO ka la ong ba kam pyrshah ïa ki jingshakri ki bank khlem kano kano ka jingpynthut hynrei la dei ban wad ïa ki lad ki lynti kum ka jingpynjlan ïa ki kynta trei shwa bad hadien ka jingïakhih, ki jingshakri da ka pynbun bad pynkhlain ïa ki kor ATM bad kiwei ki kor digital.
Ka la kyntu ïa ka tnat Finance Ministry, ka RBI, ki bank bad ka Sorkar Jylla ba kin pyrkhat biang bad ban pynthikna ba ki rai ba ki shim kim dei ban ktah ïa ka imlang sahlang bad ki rukom leh niam jong ka jylla.
Lada ym lah ban pynbeit ïa ki jingeh, ka CoMSO kan hap ban leh eiei, la maham u Balkarin.
