Ngin pyrkhat kum ka party kiei ki sienjam kiba ngin shim: Dr Ricky AJ Syngkon
Ïakren u DEO bad ka VPP halor ka jingdawa ñiew biang ïa ka vote ka Mylliem
Shillong, Lber 06: U General Secretary ka Voice of the People Party (VPP) u Dr Ricky AJ Syngkon u la ong ba party kan shong pyrkhat ha kaba ïadei bad ki sienjam kiba kum ka party kan shim ha kaba ïadei bad ka jingdawa ban ñiew biang ïa ka vote jong ka Mylleim Constituency hadien ba la dep ban ïakren bad ïoh jingshai na u District Election Officer (DEO) halor ka jingdawa ñiew biang ïa ka vote ka Mylliem.
“Na ka liang u District Election Officer ka East Khasi Hills mynta ka sngi u la khot ïa ngi ban pynshai ïa ki kyndon jong ka Election Commission of Indïa ha kabs ïadei bad ka jingdawa jong ngi ban ñiew biang ia ki vote ka Mylliem namar ka rukom ñiew ha kato ka sngi kam dei kaba ai jinghun ïa ngi bad ka rukom ñiew ruh ka long kaba don jingdkhoh wat na ka liang ki kor ba dei ban ñiew ïa ki vote ruh bad hadien kane ka jingïakren kaba u DEO u la khot ngi don ka jingsngew hun,” ong u Dr Ricky haba kren sha ki lad pathai khubor hadien ba mih na ka ophis u DEO.
“Kiei ki sienjam kiba ngin shim halor kane ka jingdawa ñiew biang ïa ka vote ngi kum ka party ngin shong pyrkhat shuwa kaei kaba bha tam kaba ngi dei ban shim,” jubab u Dr Ricky ïa ka jingkylli.
Lah ban kdew hangne na ka liang ka VPP ka la kam ba ka don ka jingdkhoh ka kor EVM na ka polling station no 44 Mawrie B la lap ba ka don ha ka ON mode kaba ha ka jingshisha ka dei ban long ha ka OFF mode bad kumjuh ruh ha kaba ïadei bad ka polling station No 8 Nongkseh Pyrda bad Lumpdeng B, ba u returning officer u la bthah ba ka jingñiew ïa ka vote kan dei da ka VVPAT slip ha ka jaka ban ñiew na ka EVM hana ba la aidaw ba ka don ka jingthut ka kor EVM.