Lada pyntreikam ïa ka UCC kan ktah ïa ka hok long trai jong ngi ki rit paid: KHNAM

0

Shillong, Lber 06: Ka Khun Hynñiewtrep National Aweakning Movement (KHNAM) ha ka sngi Nyngkong ka la maham ba lada ka sorkar pdeng ka pyntreikam ïa ka Uniform Civil Code (UCC) kumba u Myntri Kam Poh Ïing u la pynpaw kane kan ktah ïa ka hok jong uwei pa uwei u nongshong shnong jong ka Ri India khamtam eh ka hok long trai jong ngi ki rit paid.
“Ka Ri India ka dei ka Ri kaba don bun jait ki niam, bunjait ki kyntien ïakren bad bun jait ki riti dustur bad ka UCC kan pynklumar lut ïa baroh ki jingïaidbeit ïaid ryntih ha ka Ri baroh kawei bad ka lah ban wanrah ka ïa jingïaumsnam ruh,” ong u Bah F Marpna, General Secretary ka KHNAM ha ka kyrwoh sha ki lad patahi khubor. “Ka Jylla Meghalaya ka la dei lupa ka jylla kaba shah ktah bha ha ka jingïoh lad jong ki paid rithor ban rung kyrthep sha ka jylla bad lada la pyntreikam ïa ka UCC ka jingma kaba khraw ka la ap lupa ia ka jaitbynriew rit paid ka jing ngi,” u la bynrap.
Shuh shuh u la ong ba ka KHNAM ka pdiang ïa ka jingong u National President ka National People’s Party (NPP) Conrad K Sangma uba la ong myn ha ka 7 Kyllalyngkot 2023, ba ka Uniform Civil Code (UCC) ka dei kaei kaei kaba ym lah satia ban pdiang da ka NPP.
“Mynta hadien ba ka NPP bad U Conrad Sangma u la ïoh biang ban bat ïa ka synshar ha ka Jylla ngin peit hato un dang pyrshah ne ki jingkren kidei tang ki jingkren pynbeij election,” ong ka kyrwoh. Ka KHNAM ka buh ka jingkyrpad ïa ki nongmih khmat ba dang shu shah jied ha ba kidei ban ïeng ïada ïa ka jylla na ka UCC ym ban shu long ñiang kohnguh ha ki jingbthah ka BJP.
“Wat la ka Sorkar India ka la pyntip lyngba U Myntri kam poh ïing ba yn pyrteikam noh ïa ka UCC na ka liang ka seng ngin ym pdiang satia bad ngin ïai pyrshah ïa kane ka jingthmu wat lada hap ban ïa mih surok ruh,” pynkut ka kyrwoh.

Leave A Reply

Your email address will not be published.