Ngin pynduh noh ia ka bhah pule doktor, byrngem ka Myntri lada lap ba leh thok

Shillong, Nailur 04 : Ka Myntri ka tnad ka Koit ka Khiah ka sorkar jylla, Kong Ampareen Lyngdoh ha ka sngi Nyngkong ka la pyntikna ba ka sorkar jylla kan pynduh noh ïa ka bhah pule doktor lada lap ba ki kot ki sla jong kito ki samla pule ki dei shisha ki bym biang lane kiba shu leh thok.
Haba kren bad ki lad pathai khubor hadien ka jingkynduh ïa ki nongïalam ka KSU kumjuh ïa ki nongïalam jong ka Voice of the People Party, ka Myntri ka la ong ba ka sorkar ka la dep ban phah soi lypa ïa ka soskular bad kito ki samla pule doktor na ka bhah jong ka sorkar ba lada lap ba ki leh thok ïa ki kot ki sla kin shah pynduh noh ïa ka bhah pule doktor.
Shwa kane, ki nongïalam ka KSU ki la kyntu ïa ka Myntri ba kadei ban tuklar mardor halor ki kot ki sla jong ki bun ngut ki samla pule kiba thmu ban pule doktor na ka bhah jong ka sorkar jylla da kaba ong ba ki don ka jingsuba bad ka jingartatien ïa ki kot ki sla ba ki pyndonkam na ka bynta ban ïoh ïa katei ka bhah pule doktor na ka sorkar Meghalaya.
Halor kane, ka Myntri ka la ïathuh ruh ba ka tnad ka Koit ka Khiah ka la dep thoh sha ki Deputy Commissioner jong ki distrik ba kin pynshisha ïa ki kot ki sla jong kitei ki samla pule. Ka la bynrap ruh da kaba ong ba hadien ba ki la ïoh ïa ka jubab na ki DC ka tnad ka la pynmih ïa katei ka thup kyrteng jojng kitei ki bhah pule doktor kiba don baroh 92 tylli.
Shuh shuh ka la ïathuh ruh ba ha katei ka jingkynduh, na ka liang ka KSU ka la pynpaw biang ba kim hun satia bad katei ka jingpynshisha ba la leh da ki bor distrik.
Kumta, ka la ong ba haba ki ïoh pdiang ïa kum kitei ki jingkynnoh, kadei ka kamram jong ki kum ka tnad ban phah pynshisha biang sa shisien. “Ngi la bthah ïa ka KSU ban phah a ka jingthoh khnang ba kan pynsuk ïangi ban phah pynshisha biang sa shisien pat,” la bynrap biang ka Myntri.
Ha shwa kane, na ka liang ki nongïalam ka KSU kynthup ïa u President Bah Lambokstarwell Marngar kumjuh u General Secretary Bah Donald V Thabah ki la ïathuh ba ka jingwan kynduh biang jong ki ïa ka Myntri kadei hadien ba ka Union ka la lap ba ki don katto katne ngut ki briew kiba suba kiba paw kyrteng lang ha katei ka thup ba la pyllait da ka tnad dang shen.
“Kawei na ki kyndon ka long haba aplai na bynta ka bhah pule doktor na ka bhah jong ka sorkar jylla ka long ba phin don ïa ka Permanent Resident Certificate (PRC) hynrei 9ngut na ka thup Open category kim shym la phah satia ïa ka PRC hynrei ki phah tang ïa ka Provisional PRC kaba treikam tang lai bnai lane 12 bnai. Kumta haba ka kyndon kadei da ka PRC, ka PPRC kam don hok satia ban ïoh ïa ka bhah pule doktor,” ki la ong da kaba ïathuh ruh ba ka Myntri ka la kular ha ka kynhun ba ïa katei ka thup kyrteng yn hap ban pynsangeh shwa.
Shuh shuh la ïathuh ruh ba ka Myntri ka la kular ruh ba ki arngut ki samla Khasi kiba la don ha ka kyrdan kaba nyngkong bad ba ar ha ka thup Khasi – Jaintia Category kin shah kynthup lang noh ha ka Open Category bad ha ka jong ki, yn mih pli noh da kiwei pat ki samla Khasi kiba don ha ka waiting list.