Mih jingïakulmar na ka jingshah khot hajir ki HITO ha ki Pulit, mynsaw u Magistrate bad heh Pulit, shah kem ki dkhot ka Seng

Shillong, Nailur 04: Mynta ka sngi, ka jingïakulmar ka la bthei hapdeng ki Pulit bad ki nongïalam bad ki dkhot ka HITO, hadien ba u President ka Seng u Bah Donbok Dkhar ryngkat bad katto katne ki nongïalam ka Seng, ki la wanphai na Sadar Police Station ban leit ai jubab halor ka jingshah khot hajir jong u, namar ka jingdon ki dkhot ka Seng kiba ju riam ïong, kaba ki Pulit ki ong kadei ka riam jong ki.
Kane ka jingïakulmar ka la mih hadien ba ki nongialam bad dkhot ka HITO ki la wanphai na Sadar Police Station da ka jingthmu ban tur sha Secretariat ban leit bret ïa ki Placard hakhmat kane ka jaka treikam u Myntri Rangbah, ki Myntri bad ki ophisar ka sorkar jylla. Hynrei hamar ba ki la poi hajan DC ophis, ki Pulit ki la khang kdong noh ïa ki da kaba ong ba la pynjari ïa ka Section 144 Cr.PC sawdong ka Secretariat.
Hynrei ki HITO ki la thom da ka bor ïa ki jingkernar (barricade) jong ki Pulit bad beit shakhmat.
Ka kyrwoh ba la phah da u Bah Sylvester Nongtnger hadien kane ka jingjia, ka ong ba ha kane ka jingthom ki HITO da ka bor, uwei u Magistrate bad lai ngut ki Pulit ki la mynsaw.
Na ka liang jong ki Pulit haba ki la ïohi ïa kane ka jingleh satar ki HITO ki la siat da ki Stun Grenade ne ki bom bthei ba pynkyndit bad ki la khyrwit lathi ruh ïa ki nongïalam kiba hakhmat jong ka Seng. Namar ka jingshah ther bom tear gas bad stun grenade ki HITO ki la kawang da ki maw sha ki Pulit bad ha kane ka jingkawang maw jong ki, uwei u Pulit DSP u la mynsaw.
U SP u la ong ruh ba shuwa jong kane, ki dkhot ka HITO kiba don kumba sanphew ne hynriewphew ngut, ki la ïalum lang ha Parking Lot jong ka SMB kaba don mar pyrshah bad ka SBI Shillong. Na ka liang ki Magistrate bad ki Pulit kim shym la shah ia ki ba kin ïalum hangtei namar ba kim shym la pan jingbit satia. Hynrei ki la bthah ba u Bah Donbok u lah ban leit marwei ban leit ai jubab hakhmat ki Pulit bad ba ki dkhot kin ïapra noh. Pynban ki dkhot ka HITO kim shym la sngap bad ki la leit lang baroh ban leit synran ïa u President ha kaba la ïalam da u Gary Marboh, u Shaniah Nongrum, u James L. Nongpyiur bad u Wanbun N. Dkhar.
Ki Pulit ki la khot hajir ia u Bah Donbok katkum ka Kyndon 171/35 jong ka Indian Penal Code, kaba kren shaphang ka jingpynbud ïa ka riam jong kiwei da ka jingthmu ban leh thok leh shukor. Ka HITO ka la shah ujor namar ki ju don ki dkhot kiba riam ïong bad rah rh ïa ki walkie talkie haba ki pynlong ïa ki jingïalang bad ïaid paidbah.
Ha kane ka jingïakulmar kiba bun ki dkhot ka HITO ki la shah rah ha ki Pulit tangba ym pat ïoh jingtip la, la rejistar case eiei ne em ïa ki.