Ngin ap haduh ban da ïoh ïa ka shithi ba la weng noh ïa ka ‘Tax Gate’ ha Khanduli, lym kynta yn dang bteng ka jingkhang dam ka khaïi pateng: D.S War

Ïa kynduh biang ki ar District ban ïakren pynïasuk ïa ki paid Pnar bad Karbi

0

Jowai, Jymmang 24: Ki bor jong ki ar tylli ki District kata na West Jaiñtia Hills (Meghalaya) bad na West Karbi Anglong District (Assam) hynin ka sngi kila pynlong biang ïa ka jingïalang pynïasuk hapeng ki ar jaitbynriew ki pait Pnar bad ki Karbi kaba la pynlong ha BOP jong ka Assam kaba don ha ka shnong Khanduli WJHD.
Kane ka jingïakynduh biang hapdeng kine ki ar jaitbynriew ha ka sien kaba ar ka long hadien ba ki paid Karbi kim lah ban shim ïa ka rai ha ka jingïalang ba nyngkong kaba la long ha ka 16 tarik mynta hi u bnai.
Hadien jong kane ka jingïalang pynïasuk na ka liang u ma Pyrkhat Pyrphet uwei na ki dkhot jong kane ka Committee ula pynsngew ha ka jingïakren kila shim ïa kawei ka rai ba kin ap ïa ka ‘Official Letter’ na ka Karbi Anglong Autonomous Council (KAAC) ban pyntikna bala weng noh ïa ka jaka lum khajna (Tax Gate) kaba don ha Khanduli. Ki don ruh ka jingkyrmen skhem ha ka jingïalang kaba bud kin sa ïoh ka jubab bala weng ïa katei ka jaka lum khajna.
Halor kane ula pyntip ba kin sa ïa kynduh ïa ki MDC jong ka Jaiñtia Hills Autonomous District Council (JHADC) na ka bynta ban ïakren bad ki bor ka Karbi Anglong Autonomous Council (KAAC) bad ban weng noh mardor ïa katei ka khyrdop lum Khajna kaba la wanrah ki jingklumar.
Ula ong ba ka daw hi ba mih ka jingïa huri hura bad ka jingïakynad hapdeng kine ki ar jaitbynriew ka dei naduh ba la wan buh ïa katei ka Tax Gate ba la kam ba ka dang dei ka jaka kaba hap hapoh ka Shnong Khanduli. Ula ong ynda la weng ïa Katei ka jaka lum khajna la tikna ba ka jingshong suk shong shngaiñ kan wan biang kumba long ha ki por mynshwa.
Na ka liang u Damian S. War ula long ruh u Waheh Shnong ka Nangdong bad u dkhot jong katei ka Committee pynïasuk ula kren shai lada ki bor jong ka Karbi kim lah ban weng ïa katei ka Tax Gate lym kumta ka kam khaïi pateng bad ka jingleit rep leit riang hapdeng jong kine ki ar jaitbynriew kin dang bteng ïa ka jingkhang dam.
Kumta u buh ka jingkyntu ïa ki paidbah Pnar kiba sah ha ki jaka khappud ba kin long kiba ïaishah bad kane ka jingpynbeit haduh ban da wanrah ka jingïasngewthuh jingmut lang kawei da kaba ong katba kam pat lah ban pynbeit ïakane ka kam ki paid Pnar kim dei ban leit rung sha ki jaka jong ki Karbi.
U khmih lynti ba kane ka jingïakren kaba kila ïoh ban pynsngew ha kane ka jingïalang kan urlong noh ha kine ki sngi ban wan lyngba ka jingïatreilang bad ki bor ha halor na baroh ar liang.
Ha kane ka sngi la ïadonlang naduh u Districts Assistant Commissioner bah W. K Kharbuli, MCS, DSP (L/O) A. J Sangma, Namdong C& RD Block, BDO ma B. Sungoh na West Jaiñtia Hills, u Assistant Commissioner and Border Magistrate Rakesh Thakur bad u Circle Inspector Z. Baithanglangdi na West Karbi Anglong, Hamren, ki nongïalang shnong ka Khanduli bad kumjuh na Karbi.

Leave A Reply

Your email address will not be published.