Khliehriat jymmang 24: KEast Jaiñtia National Council (EJNC) Sumer Circle hynnin ka sngi ba Ar hapoh ka jingialam jong u Sakilan Chyrmang President ka la leit ban buh da ka jingujor ha u SDO bad u Enjiniar ka MePDCL Khliehriat ha kaba iadei bad ka rukom pynpoi ïa ka bai bording ne ka electricity bill bad u smart metre.
Ka seng ka la ong ba ki nongshong shnong ki la pynpaw ka jinglyngngoh ban iohi ba ka bill ka wan ha ka por bym biang (shi sien 3,4 bnai) bad kane ka buh jingeh shibun ïa ki paidbah.
Na ka liang jong ka ophis katei ka tnat ka la kular ban shimkhia ïa kane bad ban leh da kaba tyngeh ïa ki nongsam bill kiba leit ai khlem biang por. Na ka liang ka seng kala dawa jur ba ïa ka bill dei ban wan ai man la u bnai bad ïa u smart metre ruh dei ban ai ki jingpynshai paidbah ne awareness program sha kito ki shnong ki bym pat sngewthuh ïa ka jingtreikam jong u.
Ha kajuh ka por na ka liang ka seng ka la ong ruh ba kan sa nang buddien ïa kane ka kam lada kum kitei ki jingjia kin dang iai bteng na ka liang ka seng kan shim da kiwei pat ki sienjam kiba kham tyngeh. Kane ka long katkum u kyrwoh lyngba u President ka Seng.
