Kurup noh ki pulit EJHD ia u drok herion bad ka pisa kaba T 3 lak tam bad la kem noh ïa ki ba donkti

Khliehriat, Jymmang 24 : Ki pulit jong ka East Jaiñtia Hills District, hynnin ka miet ha ka por 10.30 mynmiet ki la ioh jingtip ba don kiba pyrshang ban rah bad khaii beaiñ ia ki drok herion ba la pynbit pynbiang (mastermind) da kawei ka kynthei, kaba kyrteng ka Maya Gwala alias Pukhki.
Kumta hadien ka jingioh jingtip bad hadien ka jingpynap ktem, ki pulit ha ka por 1.30 shiteng synia ki la ioh ban bat ïa ki briew kiba wan da kawei ka bus na Assam kaba don u registration number AS01-FC-8199 bad ha ka jingkhynra, ki pulit ki la lap bad kurup noh ïa ki drok Herion kiba don haduh 100.56 gram, ba la thep ha ki khyndai tylli ki synduk sabon, ki la bat bad kem noh ruh ïa ki ar ngut ki briew kiba dei ki nong khaii drok kiba shong da katei ka bud, kiba la tip kyrteng kum u Pasar Uddin aka Samir, 26 snem kyrta, uba na ka shnong Emersoan Ghat, Polo Shillong bad u Dipak Baidya, 21 snem kyrta, uba sah ha Polo hajan ka Tenjing Restaurant Shillong bad dei lyngba ka jingiatreilang bad ki pulit jong ka Pasture Beat House bad ki pulit ANTF jong ka East Khasi Hills District, la ioh ruh ban bat ïa ka Maya Gwala alias Pukhki, 29 snem kyrta, kaba sah ha Polo Greenhill, Shillong bad la wanrah ïa ka sha Khliehriat bad la kem noh ïa ka ruh.
La ong ba katei ka kynthei ka la bthah ïa kitei ki ar ngut ki nong khaii drok ba kin pynpoi ïa ki drok na Silchar, Assam sha Shillong hynrei ki la shah kem noh ha ki pulit ha Umtyra, East Jaiñtia Hills District. Ia ka ejahar la register ha Khliehriat Police Station, Case No. 37(5)2023 bad la pynngat hapoh ki kyndon aiñ 21(b)/29 jong ka NDPS Act.
Ki pulit ki la kurup noh ruh lai tylli ki mobile, kawei ka ATM card bad kawei ka Pancard bad mynta ki la don ha kti jong ki pulit bad ka jingtohkit ka dang iaid ban lap shuh shuh ïa kiwei pat kiba donkti ha kane ka kam khaii drok beaiñ.