Ngim kwah ba ki paidbah kin kylla langkñia kum ha Mukroh, sha u DC ujor ka JAC Hima Sohïong

Nongpoh, Lber 14: Ki khun ki Hajar ka Hima Sohiong hapoh lama ka Joint Action Committee (JAC) mynta ka sngi kila leit ban ujor syndon sha u Deputy Commissioner ka Ri-Bhoi District halor ka jingtur pud bad bteng ka Assam ban shna surok sha ki bynta ka shnong Nongwah Mawtamur ha Ri-Bhoi District kaba hap haka Hima Sohiong kaba dang don hapdeng ka jingpynbeit pud haka wat kaba ar hapdeng ka Meghalaya bad Assam khlem da burom shuh ïaka Status Quo hapdeng ki ar jylla.
Haba kren sha ki lad pathai khubor hadien ka jingleit kynduh ïa u Deputy Commissioner ka Ri-Bhoi, u Bah Purning Star Shabong Chairman ka JAC haka jingdonlang ki nongïalam shnong, u la ïathuh ba ka sorkar Assam kala sdang ïaka jingpynpei surok sha katei ka shnong naduh ka 1 tarik Nailur 2022 lyngba ka shnong Rani ba kynthup ïaki shnong Kynthong Paham, Damu Paham, Umterlet, Pathar Khaiong bad kumjuh ruh na Lukhra lyngba ki shnong Gorobhanga, Mawtyngkong, Jalut Rim, Jalut Thymmai ban mih sha Mawtamur.
Lyngba katei ka shithi bala ujor sha u DC la pynpaw ruh ba wat hapdeng ka Status-Quo ba dei ban burom mar kylliang da ka jylla Meghalaya bad Assam, hynrei ka Assam kam shym la pynsngap bad kyntur pud shaduh Nongwah Mawtamur da kaba shna surok bad ki ophis treikam jong ka tnad Forest, ha kaba ki paidbah mynta kila don hapdeng ka jingtieg jingsyier bad kim kwah ba ki paidbah kin dang kylla langkñia kum ka jingjia ha Mukroh.
U la ong ruh namar ka jingtieng jingsyier jong ki paidbah naka liang ka JAC kala kyrpad ruh sha u DC ba un buh pulit pahara sha kitei ki jaka ban ïada ïaki khun khasi kiba shong ba sah sha kitei ki thaiñ namar ka jingtieng jingsyier bad ka jingshah pyndik haki pulit Assam bad kumjuh ruh wat kiba thmu ban leit trei sha lyndet ki lum ha katei ka jaka kim nud shuh ban leit namar ka jingsyier ha kaba ki pulit ka Assam kila byrngem ruh wat ban pynduh noh ïa u tower ba don ha katei ka jaka.
Namarkata naka liang ka JAC ka phah ka kyrwoh kaba shai sha ka sorkar baka dei ban pynsngeh mardor ïa katei ka jingshna surok bad ka jingshna ophis beaiñ jong ka sorkar Assam ha Nongwah Mawtamur bad ka sorkar ka dei ban phah pulit ban ïada ïaki paidbah ban lait na kano kano ka jingma jingmynsaw bad jingthom bor ki pulit Assam.
U la ïathuh ruh ba naka liang u DC un sa shimkhia ban phah pynlong ka jingtohkit bad ban shim pat ki sienjam kaei ban ïaid shakhmat.