8.32 million Yen ai jingïarap ka Japan ïa ka Mary Our Help Training Centre, Shillong

0

Shillong, Lber, 15: Ka Sorkar Japan ka la ai jingïarap 8.32 million Yen lyngba ka Grant Assistance for Grassroots Human Security Projects (GGP) sha ka Mary Our Help Training Centre na ka bynta ban shna ïa ka Water Supply System bad ban shna ïa ka Sanitation Facility lane ka jaka leit bar ha Bellefonte Community College, Shillong.
Ïa ka soskular la ïasoi hapdeng u Ambassador jong ka Japan sha India u Hiroshi Suzuki bad ka Sr. Christina Kharkongor kaba long ka Secretary jong ka Mary Our Help Training Centre, ha ka sngi Baar.
Ka Sorkar Japan ka la ai jingïarap pisa lyngba ka skhim kaba la tip kum ka “Grant Assistance for Grassroots Projects (GGP)” na ka bynta ban shna ïa ki jingdonkam jong ki paidbah ha ki ri kiba dang kham duna ka ioh ka kot. Naduh u snem 1989, ïa kane ka skhim la pyntreikam da ki non-profit organizations kum ki Non-Governmental Organizations (NGOs), ki shlem ai jinghikai bad ki jaka ai jingsumar lyngba ka Japanese Diplomatic Mission ha ki ri kiba duk.
Lyngba kane ka projek, ki khynnah pule bad ki nonghikai jong ka Mary Our Help Training Centre ha Bellefonte Community College, kin dup lah ban ioh pyndonkam ïa ka um bad ïa ka jaka leit bar.
Ïa ka Mary Our Help Training Centre ha Bellefonte Community College, Shillong la seng ha u snem 2010 bad ka la ai jinghikai ei sha ki khynnah khamtam eh ïa kiba wan na ki longing kiba duk.
Ka Sorkar Japan ka kyrmen ba kane ka projek lyngba ka GGP scheme kan ïarap ban pynjanai ïa ka rukom im jong ki briew ha ka ri India bad ban pynkhlaiñ shuh shuh ïa ka jingïatreilang hapdeng ka ri Japan bad ka ri India.

Leave A Reply

Your email address will not be published.